105 mln teńge: Qostanaıda alaıaqtyqqa qatysty is boıynsha kásipkerge úkim shyǵaryldy
QOSTANAI. KAZINFORM — Qostanaı qalalyq soty sharýa qojalyǵynyń kásipker áıelge qarsy bergen talap-aryzyna qatysty isti qarady. Sharýa qojalyǵy 105 mıllıon teńgeden astam somaǵa bıdaı jetkizip bergen, alaıda aqysyn ala almaǵan, dep habarlaıdy Kazinform agenttiginiń tilshisi.
Shartqa sáıkes, tólem 20 kúndik merzimge keıinge qaldyrylyp tólenýi tıis bolǵan. Alaıda JShS basshysy retinde áreket etken áıel óz mindettemelerin oryndamaǵan. Amaly taýsylǵan fermerler sotqa júginýge májbúr bolǵan.
Buǵan deıin kásipker áıel asa iri kólemde múlikti urlaǵany úshin sottalǵan eken. Sot barysynda onyń aýyl sharýashylyǵy taýaryn óndirýshilerden bıdaıdy tólem jasaý nıetinsiz qabyldaǵany anyqtaldy.
Іs materıaldaryna sáıkes, sharýashylyqqa keltirilgen zalal kólemi shamamen 100 mıllıon teńgeni quraǵan. 2022 jyldyń qańtarynan 2024 jyldyń aqpanyna deıingi kezeńde jaýapker bar bolǵany 21,5 mıllıon teńge ǵana qaıtarǵan. Qalǵan qarajattyń tólengenin dáleldeıtin qujattar sotqa usynylmaǵan.
Sot talap-aryzdy ishinara qanaǵattandyryp, kásipkerdi materıaldyq zalaldy óteýge jáne sot shyǵyndaryn tóleýge mindettedi. Qazirgi ýaqytta bul sheshim zańdy kúshine engen joq.
Eske sala ketsek, Qostanaı oblysynda kásiporyn óz qyzmetkerlerine 56 mıllıon teńge shamasynda eńbekaqy tólemegenin jazdyq.