105 eldiń azamaty Qazaqstanǵa elektrondy vızamen kire alady — QR ІІM
ASTANA. KAZINFORM — Qazaqstanda týrızmdi damytý úshin sheteldik qonaqtardyń elge kelýi men Qazaqstanda bolý tártipteri jeńildetildi. Bul týraly Іshki ister mınıstri Erjan Sádenov Úkimet otyrysynda málimdedi.
Mınıstrdiń aıtýynsha, negizgi týrıstik aımaqtarda demalýshylardyń qaýipsizdigin qamtamasyz etý jumystary júıeli júrgizilip keledi. Týrıster qaýipsizdigin qamtamasyz etý úshin 18 aımaqtyń kórikti jerleri men ulttyq saıabaqtarynda týrıstik polıtsııa bólimsheleri qyzmet atqarady. Qyzmetkerler shet tilderin meńgergen. Olar týrısterge konsýltatsııa berip, zańsyz jeke tasymaldaýdyń jolyn kesedi.
— Búginde 105 eldiń azamattary elshilikterge júginbeı-aq, elektrondyq vıza arqyly Qazaqstanǵa kire alady. Sonymen birge, IT-mamandarǵa arnalǵan Digital Nomad Visa jáne týrısterge arnalǵan Neo Nomad Visa berý uıymdastyryldy. Qabyldaýshy tarap sheteldik azamattyń kelýi týraly habarlamany onlaın formatta joldaıdy, — dep atap ótti Erjan Sádenov.
Sondaı-aq áýejaılarda jáne iri shekara ótkelderinde QR-kody bar «týrıstik kartalar» beriledi. Onda elimizde bolý erejeleri, shuǵyl qyzmetter men baılanys operatorlary týraly qajetti aqparat ornalastyrylǵan.
— Kóshi-qon qyzmetteriniń aýqymyn keńeıtý maqsatynda QazETA mobıldi qosymshasy ázirlenýde. Onyń kómegimen sheteldikter JSN alýǵa jáne kóshi qon salasyndaǵy kóptegen qyzmetterge qol jetkize alady. Qazir Parlamentte tıisti túzetýler qaralyp jatyr, — dedi sala mınıstri.
Aıta keteıik, Qazaqstannyń týrıstik oryndaryna aparatyn joldar jóndeýden ótip jatyr. Bıyl Almaty-Óskemen jolyndaǵy jumystar aıaqtalyp, jol júrý ýaqyty 4 saǵatqa qysqarǵan.
Oǵan qosa, Qazaqstannyń 124 vokzaly jańǵyrtýdan ótip, jańadan salynyp jatyr. Qazir Kókshetaý, Býrabaı kýrorty, Qonaev, Kóktýma, Aqshı, Mankent, jáne Balqash-2 vokzaldarynda jumystar aıaqtaldy.
Suranystyń artýyna baılanysty eldegi týrıstik baǵyttarǵa qosymsha 15 poıyz júre bastaıdy.
