104,4% ósim: Qazaqstannyń agrosalasy bıyl jarty jyldy tabysty aıaqtady
ASTANA. KAZINFORM – Bul týraly Aýyl sharýashylyǵy mınıstri Aıdarbek Saparov Almaty oblysynyń turǵyndarymen, onyń ishinde óńirdiń aýyl sharýashylyǵy taýaryn óndirýshilerimen kezdesýinde aıtty, dep habarlaıdy QR Aýyl sharýashylyǵy mınıstrliginiń baspasóz qyzmeti.
Mınıstrliktiń baspasóz qyzmetiniń habarlaýynsha, kezdesýge fermerlik sharýashylyqtardyń, qaıta óńdeý kásiporyndarynyń, salalyq qaýymdastyqtardyń jáne jergilikti atqarýshy organdardyń ókilderi qatysty.
-Agroónerkásip kesheniniń aldynda aýqymdy mindetter tur. Bıyl aýyl sharýashylyǵy salasynyń ósimin 5,9%-ǵa, azyq-túlik óndirisin 10,5%-ǵa, al sýsyndar óndirisin 11,5%-ǵa arttyrýymyz qajet. Bul Memleket basshysynyń aýyl sharýashylyǵynyń jalpy ónim kólemin eki esege ulǵaıtý jónindegi tapsyrmasyn oryndaýdyń naqty qadamy, – dedi Aıdarbek Saparov.
Aıta ketý kerek, bıylǵy jyldyń alǵashqy alty aıynyń qorytyndysy boıynsha respýblıkadaǵy aýyl sharýashylyǵynyń naqty kólem ındeksi 104,4%-dy qurady.
Sonymen qatar mınıstr Almaty oblysynda jumysty jandandyrý qajettigin aıtyp, óńirdiń mejeli kórsetkishterge qol jetkizý áleýetiniń zor ekenin aıtty.
Kezdesý barysynda agrarshylardy memlekettik qoldaý sharalaryna erekshe nazar aýdaryldy.
Aıdarbek Saparov salaǵa kórsetiletin qarjylyq qoldaý tetikteri aıtarlyqtaı keńeıtilgenin atap ótti. Jalpy kólemi 750 mlrd teńgeni quraıtyn kóktemgi egis jumystaryn erte qarjylandyrý tájirıbesi jalǵasý ústinde. Sondaı-aq, aýyl sharýashylyǵy tehnıkasyn jeńildetilgen lızıngpen berý, qaıta óńdeý kásiporyndaryn jeńildetilgen nesıeleý baǵdarlamalary jáne «Damý» qory arqyly qaryzdarǵa kepildik berý tetikteri iske asyrylyp jatyr. Bul aýyl sharýashylyǵy taýaryn óndirýshiler úshin qaryz qarajatynyń qunyn tómendetýge jol ashady.
Kezdesýde mal sharýashylyǵyn damytý máselesine de erekshe kóńil bólindi.
Osyǵan baılanysty Úkimet Mal sharýashylyǵyn damytýdyń keshendi josparyn bekitti. Onyń sheńberinde «Igilik», «Bereke» jáne «Jaılaý» jańa jeńildetilgen nesıe baǵdarlamalary iske qosyldy. Olar asyl tuqymdy mal basyn satyp alýǵa, jaıylym ınfraqurylymyn damytýǵa jáne sharýashylyqtardy qoljetimdi qarjylandyrýmen qamtamasyz etýge baǵyttalǵan.
Aıdarbek Saparov agrarshylardy eginshilik pen mal sharýashylyǵyn qatar damytatyn aralas sharýashylyq júrgizý modelin belsendi engizýge shaqyrdy. Onyń aıtýynsha, bul tásil aýyl turǵyndaryn jyl boıy turaqty jumyspen qamtyp, jer resýrstaryn tıimdi paıdalanýǵa jol ashyp, aýyl sharýashylyǵy kásiporyndarynyń ekonomıkalyq ornyqtylyǵyn arttyrýǵa múmkindik bermek.
Kezdesý barysynda agrobıznes ókilderi mal jáne jylyjaı sharýashylyǵy jobalaryn qarjylandyrý, tarıftik saıasat, sondaı-aq saladaǵy ózge de ózekti máselelerdi kóterdi. Mınıstr qoıylǵan barlyq suraqtarǵa jan-jaqty jaýap berip, jaýapty qurylymdyq bólimshelerge tıisti tapsyrmalar júktedi.
Kezdesýdi qorytyndylaǵan Aıdarbek Saparov Aýyl sharýashylyǵy mınıstrligi salany damytýǵa baǵyttalǵan júıeli sharalardy aldaǵy ýaqytta da jalǵastyratynyn atap ótti.
-Bizdiń maqsatymyz – Prezıdenttiń tapsyrmalaryn sapaly oryndap, eldiń azyq-túlik qaýipsizdigin qamtamasyz etý jáne agrarshylardyń tıimdi jumys isteýine qolaıly jaǵdaı jasaý. Osy maqsatta jeńildetilgen nesıeleýdi damytyp, qosylǵan quny joǵary aýyl sharýashylyǵy ónimderin qaıta óńdeýdi yntalandyryp, memlekettik qoldaý sharalaryn kezeń-kezeńimen keńeıtip kelemiz. Bul jumys agroónerkásip kesheniniń ornyqty damýy men otandyq aýyl sharýashylyǵynyń básekege qabilettiligin arttyrýǵa baǵyttalǵan júıeli reformalar aıasynda jalǵasady, – dedi mınıstr.
Kezdesýden keıin Aıdarbek Saparov azamattardy jeke qabyldady.
Osyǵan deıin Aýyl sharýashylyǵy kooperatıvteri bir jylda 9,6% artqany týraly jazdyq.
