104 myńnan astam talapker grant konkýrsyna qatysýǵa ótinish berdi
104 myńnan astam talapker bilim granttaryn taǵaıyndaý konkýrsyna qatysýǵa ótinish berdi. Ótken jylmen salystyratyn bolsaq, 2023 jyly 94 myńnan astam ótinish qabyldanǵan bolatyn.
Esterińizge salsaq, bıyl bakalavrıatqa túsý úshin 79 myńǵa jýyq grant bólinip otyr. Granttardyń basym bóligi ınjenerlik jáne tehnıkalyq baǵyttarǵa bólingen. Bıyl alǵash ret ishinara oqý aqysy bar saralanǵan granttar engizildi. «Pedagogıkalyq ǵylymdar» jáne «Áleýmettik ǵylymdar, jýrnalıstıka jáne aqparat» baǵyttary boıynsha 150 saralanǵan granttan bólingen. Sondaı-aq, «Serpin» baǵdarlamasy arqyly túsýshilerge 3 903 grant bólingen. Granttar tiziminde 5 000 halyq tyǵyz qonystanǵan jáne batys óńirlerdiń jastaryn jetekshi joǵary oqý oryndarynda oqytý úshin maqsatty bilim berý granty bar.
«Eń kóp tańdalǵan qala — Almaty, 42 myń bala ońtústik astanamyzdy stýdenttik shaq ótkizý úshin tańdaǵan. Elordanyń oqý oryndarynda oqý úshin 22 myń ótinish qabyldansa, 6,5 myń adam Shymkent q. ýnıversıtetterinde oqýǵa nıet bildirgen.
Birneshe jyl qatarynan talapkerler eń kóp suranysqa ıe oqytý baǵyttary boıynsha tańdaýdy ózgerissiz jasap jatyr. Ótinishterdiń kópshiligi «Pedagogıkalyq ǵylymdar», «Injenerlik, óńdeý jáne qurylys salalary» jáne «Aqparattyq-kommýnıkatsııalyq tehnologııalar» sııaqty baǵyttarǵa berildi. Qabyldaý naýqanynyń nátıjesine sáıkes bolashaq tis dárigerleri, dıplomattar, muǵalimder jáne psıhologtar arasynda bir granttyq orynǵa eń úlken konkýrs kútilýde», — dep jazdy Ǵylym jáne joǵary bilim mınıstrliginen.
Granttar taǵaıyndaý jónindegi sheshimdi Respýblıkalyq konkýrstyq komıssııa qabyldaıdy. Onyń quramyna QR Parlamentiniń depýtattary, memlekettik organdardyń jáne qoǵamdyq uıymdardyń ókilderi kiredi.
Grant ıegerleriniń tizimi QR Ǵylym jáne joǵary bilim mınıstrliginiń saıtynda jáne @gylym_jogary_bilim telegram-arnasynda, www.testcenter.kz saıty (UTO-nyń resmı saıty) jáne TESTCENTERKZ telegram-arnasynda 10 tamyzǵa deıin jarııalanady.
Al joǵary oqý oryndaryna qabyldaý, ádettegideı, 25 tamyzda aıaqtalady.
