103 myńnan astam qazaqstandyq Skills Enbek platformasynda onlaın-kýrstardan ótken
ASTANA. KAZINFORM – 2024 jyldyń basynan beri 103,1 myń azamat, onyń ishinde 50,1 myńǵa jýyq jumyssyz Skills Enbek kásiptik oqytý platformasynda (budan ári – Platforma) onlaın-kýrstardan ótkeni týraly sertıfıkat aldy. Platformada barlyǵy 491,8 myń qazaqstandyq tirkelgen, onyń 130,4 myńy – 2024 jyly tirkeldi. Bul týraly Eńbek jáne halyqty áleýmettik qorǵaý mınıstrligi habarlady.
Oqýdan ótken 50,1 myń jumyssyz azamattyń 15,3 myńǵa jýyǵy – Aqtóbe, Túrkistan, Qaraǵandy, Qyzylorda oblystarynyń jáne Shymkent qalasynyń jastary.
Platforma iske qosylǵannan bastap avtorlar ártúrli baǵyttar boıynsha 631 kýrs jarııalady, onyń 292-i tegin. Sondaı-aq odan ári oqý úshin bilim berý alańdaryna aýysý múmkindigimen Courstore, Fluent Education jáne ıAndeks Qazaqstan seriktesteriniń kýrstary bar.
Kýrstardyń uzaqtyǵy – 1-den 72 saǵatqa deıin.
Qarasha aıyndaǵy eń kóp suranysqa ıe kýrstar – «Postroenıe otdela prodaj v otele», «Vvedenıe v sotsıalnýıý rabotý», «Pishý jáne tigý», «Kassır», «Osnovy sotsıalnoı raboty» jáne «Ýpravlenıe personalom».
Platformada IT jáne telekommýnıkatsııalar, qaýipsizdik jáne TJ, SMART SKILLS, áleýmettik qyzmet kórsetý jáne t.b. salalardaǵy túrli mamandyqtar boıynsha tegin kýrstar sany únemi artyp keledi.
Budan buryn habarlaǵandaı, Platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa jáne «ómir boıy oqytý» tujyrymdamasyn ilgeriletýge baǵyttalǵan. Ol marketpleıs – qyzmetter naryǵy qaǵıdaty boıynsha onlaın kýrstarǵa qol jetkizýdi usynatyn halyqaralyq oqytý alańdaryna uqsas qurylǵan.
Oqýǵa https://skills.enbek.kz/ siltemesi arqyly nemese enbek.kz saıtyndaǵy «Onlaın oqytý» bólimin tańdaý arqyly tikeleı qol jetkizýge bolady.
Platformada bilim alýshy oqytýdyń qolaıly qarqyny men tilin, materıaldy berýdiń yńǵaıly prıntsıpin derbes tańdaıdy, bilim berý úderisindegi óziniń ilgerileýin baqylaı alady.
Bilim alýshy úshin artyqshylyqtar: keńeıtilgen kýrstardy izdeý, sabaqtyń túsinikti qurylymy, oqý protsesin baqylaý jáne kýrs avtorlarymen jyldam ózara árekettesý.
Oqý aıaqtalǵannan keıin bilim alýshy 70% shekti deńgeımen testileý tapsyrýǵa tıis. Onlaın kýrsty sátti aıaqtaǵan jaǵdaıda daǵdylardy ıgerý týraly sertıfıkat beriledi. Kýrsty aıaqtaýdyń mindetti sharty – stýdent tarapynan kýrsty baǵalaý.
Alynǵan sertıfıkat Elektrondyq eńbek bırjasynda (enbek.kz) tirkelgen kezde bilim alýshy jasaǵan túıindemede avtomatty túrde kórsetiledi. Qyzmetkerlerdi izdeý kezinde áleýetti jumys berýshi Platformada sátti oqýdan keıin alynǵan sertıfıkattardy kóre alady.
Avtorlar men ázirleýshilerge arnalǵan platformada onlaın kýrstardy ornalastyrý tegin. Kýrstar memlekettik jáne orys tilderinde ornalastyrylýy múmkin, aqparat berýdiń ártúrli formattary: mátin, prezentatsııa, beıne jáne aýdıo materıaldar, ınfografıka jáne basqa túrleri bolýǵa tıis. Platforma erekshe qajettilikteri bar bilim alýshylar úshin ınterfeısti beıimdeý múmkindigin boljaıdy.
Kýrs avtorlary úshin yńǵaıly sabaq qurastyrýshy, jarııalanǵan kýrstardyń statıstıkasy men tıimdiligin qaraýǵa qoljetimdi, sertıfıkattardyń ártúrli dızaıny kózdelgen, sondaı-aq oqý qunyn aldyn ala esepteýge arnalǵan onlaın-kalkýlıator bar.
2023 jyldyń jeltoqsan aıynan bastap kýrstardy Enbek mobıldi qosymshasy arqyly oqýǵa bolady, qosymshany Google Play jáne App Store-dan júkteýge bolatynyn esterińizge salamyz.
Platformada tirkelý jáne jumys isteýge qatysty barlyq suraqtar boıynsha «ERDO» AQ jaýapty qyzmetkerlerimen baılanysýdy suraımyz: 8 (7172) 95 43 17 (ishki. 877, 878, 888).