102 jastaǵy maıdanger: pandemııa degen qarýsyz maıdanda jeńiske jetý úshin tártip kerek
Alekseı Fırsov 1919 jyly 27 naýryzda Reseıdegi Penza oblysy Vadın aýdanynyń Vasılevka aýylynda sharýa otbasynda dúnıege kelgen. Bıyl soǵys ardageri 102 jasqa tolyp otyr. Jeńis kúni qarsańynda ózin jaqsy sezinedi, kóńil-kúıi de kóterińki. Densaýlyǵynda eleýli kinárát joq. Ara-tura yńyldap maıdan ánderin aıtyp qoıatyny da bar.
«1939 jyly meni Keńes Armııasy qataryna shaqyryp, Chıta oblysynyń Zabaıkalsk áskerı okrýgine jiberdi. 1941 jyly surapyl soǵys bastalyp ketti. Otanymyzdy qorǵap, jaýdy jeńip shyqqanda keýdemizdi qýanysh kernedi. 46-shy jyly ǵana týǵan aýylyma aman-esen oraldym, - deıdi ardager.
1953 jyly ol Qazaqstanǵa kóship kelgen. Qonys tiregen jeri – Shemonaıha aýdanynyń Shemonaıha qalasy. Búgingi tańda ardager kishi qyzymen atalǵan aýdandaǵy Ýst-Talovka kentinde turady. Onyń 7 nemeresi, 14 shóberesi jáne 2 shópshegi bar. Eldegi karantındik shekteýlerge baılanysty ardager ózin-ózi oqshaýlaýdyń barlyq sharttaryn qatań saqtaýda.
Meıramǵa oraı ShQO boıynsha QAJ departamentiniń qyzmetkerleri soǵys ardagerine baryp, QR ІІM mınıstri E.Turǵymbaevtyń quttyqtaý hatyn tabys etti. Sonymen qatar Alekseı Fırsovqa estelik syılyqtar berildi. Maıdanger qyzmetkerlerge alǵysyn aıtyp, bolashaq urpaqqa tilegin bildirdi:
«Biz soǵysty kórdik, jeńiske jettik. Endi osy koronavırýs pandemııasyna da tap bolyp otyrmyz. Halyqqa aıtarym – dárigerlerdiń keńesterine qulaq asyńyzdar. Árqaısyńyz jaýapkershilik tanytyp, karantın talaptaryn saqtańyzdar. Tek birlik pen tártiptiń arqasynda bul synaqty ótkeremiz».
ShQO boıynsha QAJ departamenti bastyǵynyń orynbasary Maqsat Seıtahmetovtiń aıtýynsha, qazirgi urpaq soǵysta aıanbaı shaıqasqan batyrlarǵa máńgi qaryzdar.
«Uly Otan soǵysynyń ardagerleri úshin bul kún erekshe mańyzǵa ıe. Jyl saıyn 9 mamyrda maıdangerlerimiz áskerı sherýdi kórip, quttyqtaýlardy qabyldaıdy. Alaıda bıyl ekinshi jyl qatarynan koronavırýs pandemııasyna baılanysty áskerı sherýler toqtatyldy. Biraq soǵan qaramastan, biz ardagerlerdi nazardan tys qaldyra almaımyz. Osy rette, Alekseı Fırsovqa merekelik kóńil-kúı syılaıyq dep sheshtik. 102 jastaǵy ardagerdi merekemen quttyqtap, óz rızashylyǵymyzdy jetkizdik», - dedi ol.
