«102»-ge jalǵan qońyraý shalǵandarǵa qandaı jaza qoldanylady
ASTANA. KAZINFORM — 102 — shuǵyl kómek nómiri. Bul baılanys arnasy táýlik boıy, demalyssyz jáne úzilissiz jumys isteıdi. Polıtsııa «102» nómirine jalǵan qońyraý shalý jaýapkershilikke ákeletinin eskertedi, dep habarlaıdy ІІM baspasóz qyzmeti.
102 nómiri arqyly azamattar quqyq buzýshylyq, qylmys, qoǵamdyq tártiptiń buzylýy, turmystyq janjal, jol-kólik oqıǵasy nemese ózge de qaýip tóndiretin jaǵdaılar týraly jedel habarlaı alady.
— Árbir qońyraý — bul naqty áreketke sebep. Dıspetcherler habarlamany qabyldap, tıisti narıadtardy oqıǵa ornyna jiberedi. Polıtsııa qyzmetkerleri ýaqytpen sanaspaı, adam ómiri men densaýlyǵyn qorǵaý úshin jedel áreket etedi. Alaıda sońǵy ýaqytta jalǵan shaqyrtýlar máselesi ózekti bolyp otyr. Keıbir azamattar 102 nómirine oılanbastan, jalǵan aqparat berip jatady. Bul — polıtsııa qyzmetkerleriniń ýaqytyn bosqa jumsaýǵa, arnaıy tehnıkalar men janar-jaǵarmaı shyǵynyna, shynaıy qaýip tónip turǵan jaǵdaılarǵa keshigip jetýge sebep bolýy múmkin. Sol sátte bir jerde shynymen kómekke muqtaj adam bolýy ábden múmkin, — deıdi tártip saqshylary.
Vedomstvo málimetinshe, bir jalǵan habarlama — bireýdiń ómirine tóngen naqty qaýipke ýaqytyly áreket etpeýge ákelýi yqtımal. Zań aldyndaǵy jaýapkershilik Qazaqstan Respýblıkasynyń qoldanystaǵy zańnamasyna sáıkes, jalǵan shaqyrtý nemese quqyq qorǵaý organdaryna kórineý jalǵan aqparat berý jaýapkershilikke ákep soǵady.
— Mundaı áreketter úshin aıyppul qarastyrylǵan. Eger jalǵan habarlama aýyr zardaptarǵa nemese iri shyǵynǵa alyp kelse, kináli tulǵa qylmystyq jaýapkershilikke de tartylýy múmkin. Zańdy bilmeý — jaýapkershilikten bosatpaıdy. Polıtsııa qyzmeti — árbir azamattyń qaýipsizdigi úshin jumys isteıtin mańyzdy qurylym. Sondyqtan «102» nómirin tek shynaıy qaýip nemese jaǵdaıynda paıdalanyńyz. Jalǵan aqparat taratýdan aýlaq bolyńyz. Qoǵamdyq tártip pen zań talaptaryn saqtańyz. Qoǵamdyq qaýipsizdik — ortaq jaýapkershilik. Árqaısymyzdyń sanaly áreketimiz myńdaǵan adamnyń tynyshtyǵyna áser etedi. «102» — ázil úshin emes, ómirdi qorǵaý úshin! — dep eskertti mınıstrlik.
Buǵan deıin Qostanaıda terrorızmge qatysty jalǵan habarlama taratqan jasóspirim sottalǵanyn jazǵanbyz.