101 jastaǵy áje: Kópshiliktiń tańdaýynda bereke bolady

AQTAÝ. QazAqparat - Mańǵystaý oblysy Qaraqııa aýdanynyń №148 saılaý ýchaskesinde daýys bergen 101 jastaǵy Hanym Súıindikova — ǵasyrdyń júzin kórgen baqytty áje.

Ol qazaq dalasyn qara bult torlaǵan náýbet jyldarynda qýǵyn-súrgin kórgen, onyń beri jaǵynda UOS-nyń azabyn arqalaǵan batyr ana.

«Jasym júzden assa da aınalamda bolyp jatqan jańalyqtyń bárin estip, bilip otyramyn.

Saılaý degen — kóptiń tańdaýy ǵoı. Kópshilik qatysqan sharýanyń berekesi bolady.

Men búgingi saılaýda urpaq bolashaǵy úshin daýys berdim, elde oń ózgerister kóp bolsyn», — dedi Hanym áje.

Ájemiz óziniń batasyn berdi jáne saılaý ýchaskesiniń músheleri daıyndaǵan syı-sııapattaryn tabys etti.