101 jasqa qaraǵan shaǵynda Qazaqstannyń eńbek sińirgen ártisi Habıba Elebekova dúnıeden ozdy

M.Áýezov atyndaǵy Qazaq memlekettik drama teatrynyń baspasóz qyzmetiniń habarlaýynsha, Habıba Elebekovamen qoshtasý 20 qazan kúni saǵat 10-da atalǵan teatrda ótedi.   

Habıba Elebekova 1916 jyly Qaraǵandy oblysy Qarqaraly aýdany Tomar aýylynda dúnıege kelgen.

1934-35 j j. Qarqaraly halyq teatrynda qyzmet istegen.

1935-37 j j.  M. Áýezov atyndaǵy drama teatr  janyndaǵy eki jyldyq stýdııany bitirgen.

«1935 j. beri M. Áýezov teatrynda úzilissiz qyzmet etti. Belgili aktrısa 1935 jylǵy alǵashqy qadamyn qazaqtyń kásibı teatr rejısseri J. Shanınniń ózi jazyp, ózi qoıǵan «Arqalyq batyr» tarıhı dramasyndaǵy» Qarakózden bastap, qara shańyraq teatrda ulttyq qunary myqty kóptegen rol jasady»,  delingen teatr saıtynda.

Sahnadaǵy rolderi:

Ulttyq klassıka men zamanaýı dramatýrgııada: «Arqalyq batyr» tarıhı dramasynda Qarakóz, M. Áýezovtiń «Qara qypshaq Qobylandysynda» Kúnikeı, «Abaıynda» Qanykeı, Uljan, B.Maılınniń «Maıdanynda» Mamyq, Ǵ. Músirepovtiń «Qozy Kórpesh-Baıan sulýynda» Maqpal, Sh. Qusaıynovtyń «Marabaıynda» Márııash, «Amangeldide» Aqjan, Q. Amanjolovtyń «Dosymnyń úılenýinde» Aıǵanym, A. Tasymbekov pen Q.Ysqaqtyń «Kebenek kıgen arýlarynda» Tutqyn, A. Súleımenovtiń «Jetinshi palatasynda» Kempir, Iran-Ǵaıyptyń «Estaıdyń Qorlanynda» Aınash t.b.

Álemdik dramatýrgııada: G. Lorkanyń «Bernarda Albanyń úıinde» Ponsııa, Ostrovskııdiń «Naızaǵaıynda» Kezbe áıel, «Talanttar men tabynýshylarynda» D. Andreevna, Gogoldiń «Revızorynda» Poshlepkına, «Vetnam juldyzynda» Than, M. Meterlınktiń «Soqyrlarynda» Soqyr áıel t.b.

H. Elebekova biraz kórkem jáne derekti fılmderge tústi. Olardyń ishinde áıgili rejısser S. Qojyqovtyń «Eger bizdiń árqaısymyz...» (1961), sondaı-aq, aktrısa túsken eń sońǵy fılm D. Joljaqsynovtyń «Birjan saly» (2009).

H. Elebekova óziniń ómir-óner serigi J. Elebekov jáne HH ǵasyrdaǵy qazaq óneri týraly «Úni ketpes qulaqtan» (1981) kitabyn jazdy, bul eńbegi tolyqtyrylyp «Án-amanat» (1984) «Qaıran, Júsekem» (1998) degen ataýlarmen qaıta basyldy. Ulttyq óner tarıhyn jaqsy biletin aktrısa biraz ánniń, mysaly, Abaıdyń «Segiz aıaǵy», t.b. óz túpnusqasynda jetýine úlken eńbek sińirdi. Quımaqulaq deýge bolatyn Habıba apa kóp jyrlardy, mysaly, Maǵjan Jumabaevtyń jyrlaryn túgeldeı derlik jatqa  oqıtyn óneri bar.

Qazaqstannyń eńbek sińirgen ártisi (1976), QR Mádenıet mınıstrliginiń  «Mádenıet úzdigi» tósbelgisimen marapattalǵan (2012).

«Habıba Elebekova» atty kitap (joba avtory Á. Bópejanova) «Áıgili adamdar» serııasymen «Óner» baspasynda jaryq kórdi (2012).