Elimizde 1000 tósektik bes jańa balalar aýrýhanasy salynady
ASTANA. KAZINFORM - Qazaqstanda jalpy syıymdylyǵy 1000 tósektik bes zamanaýı kópbeıindi balalar aýrýhanasy salynady, dep habarlaıdy QR Densaýlyq saqtaý mınıstrliginiń baspasóz qyzmeti.
Jańa medıtsınalyq mekemeler Atyraý, Aqtóbe, Almaty, Shymkent jáne Qaskeleń qalalarynda boı kóteredi. Bul myńdaǵan balaǵa em alý úshin basqa óńirlerge barmaı-aq, turǵylyqty jerine jaqyn jerde mamandandyrylǵan medıtsınalyq kómek alýǵa múmkindik beredi.
Bes aýrýhananyń árqaısysy 200 tósekke eseptelgen. Jobalardy iske asyrý balalarǵa sapaly medıtsınalyq kómektiń qoljetimdiligin arttyrýǵa jáne óńirlerdegi zamanaýı medıtsınalyq ınfraqurylymdy damytýǵa baǵyttalǵan.
Jańa aýrýhanalardyń qurylysy máseleleri Densaýlyq saqtaý vıtse-mınıstri Tımýr Mýratovtyń Azııa damý banki (ADB) jáne Azııa ınfraqurylymdyq ınvestıtsııalar banki (AIIB) ókilderimen kezdesýinde talqylandy.
Kezdesý barysynda vıtse-mınıstr óńirlerdegi balalar medıtsınasynyń damýy jáne balalardyń turǵylyqty jeri boıynsha mamandandyrylǵan medıtsınalyq kómek alýyna jaǵdaı jasaý mańyzdy ekenin atap ótti.
-Bizdiń basty mindetimiz – balanyń qaı óńirde turatynyna qaramastan, sapaly medıtsınalyq kómektiń barlyǵyna qoljetimdi bolýyn qamtamasyz etý. Jańa aýrýhanalar óńirlerdiń múmkindikterin keńeıtip, balalardy emdeý úshin barynsha qolaıly jaǵdaı jasaýǵa múmkindik beredi, – dedi Tımýr Mýratov.
Sonymen qatar Almaty qalasynda 500 tósektik respýblıkalyq ǵylymı balalar gospıtalin salý máselesi qarastyrylyp jatyr. Bul nysan balalarǵa mamandandyrylǵan medıtsınalyq kómek kórsetý júıesin damytýdaǵy mańyzdy qosymsha býynǵa aınalady.
-Almaty qalasynda 500 tósektik respýblıkalyq ǵylymı balalar gospıtalin salý máselesin qarastyryp jatyrmyz jáne sizdermen áriptestik ornatý múmkindikterin pysyqtaýdamyz, – dep habarlady vıtse-mınıstr.
Qazirgi ýaqytta Densaýlyq saqtaý mınıstrligi múddeli memlekettik organdarmen birlesip, jobalyq qujattamany ázirleý jáne qarjylandyrý tetikterin pysyqtaýdy qosa alǵanda, jobalardy iske asyrý boıynsha daıyndyq jumystaryn júrgizip jatyr.
Kezdesýdiń sońynda Qazaqstandaǵy medıtsınalyq kómekti josparlaý men uıymdastyrý júıesin jetildirýge baǵyttalǵan HOPE tehnıkalyq kómek jobasyna da erekshe nazar aýdaryldy.
Kezdesý qorytyndysy boıynsha taraptar ınvestıtsııalyq baǵdarlamany daıyndaý jáne ony iske asyrýdyń kelesi kezeńderin aıqyndaý baǵytyndaǵy birlesken jumysty jalǵastyrýǵa ýaǵdalasty.
-Balalar aýrýhanalary jelisin damytý Memleket basshysynyń densaýlyq saqtaý júıesin jańǵyrtý jónindegi tapsyrmalary aıasynda júzege asyrylýda. Basty maqsat – balalardyń turǵylyqty óńirine qaramastan, zamanaýı ári sapaly medıtsınalyq kómek alýyna qoljetimdilikti qamtamasyz etý bolyp tabylady,-delingen habarlamada.
Osyǵan deıin Qazaqstanda aýqymdy qurylysqa 6,5 trıllıon teńge jumsalatyny týraly jazdyq.
