1000 teńgelik kıimge talas: Qyzylordada dúken ıesine aıyppul salyndy
QYZYLORDA. KAZINFORM — Qyzylordadaǵy saýda ortalyǵynda jeńildikpen satylǵan kıimderdi taratý kezinde keleńsiz jaǵdaı boldy.
Áleýmettik jelide taraǵan beınejazbada saýda núktesine jınalǵan turǵyndardyń kıim alý kezinde ıterisip, bir-birimen talasqan sáti beınelengen.
— Bul — Qyzylordadaǵy «Jibek joly» saýda úıiniń 3-qabatynda 4 qarasha kúni bolǵan jaǵdaı. Adamdardy qorlaý emes pe bul?! Ortaǵa bir qapty laqtyryp jibergen. Sodan keıin adamdar 1000 teńgelik kúrtelerdi alý úshin bir-biriniń ústine shyǵyp, talasa bastaǵan. Kıimderdi bir-birden, kezekpen taratýǵa bolmaı ma? — delingen Instagram áleýmettik jelisindegi KritikaKyzylordy paraqshasyndaǵy jazbada.
Áleýmettik jeli qoldanýshylar qaýipsizdik talaptarynyń saqtalmaýyna jáne naýqannyń uıymdastyrylýyna syn aıtty.
Qyzylorda ákimdigi atalǵan máselege baılanysty túsinik berdi.
— 4 qarasha kúni ótkizilgen naýqan aıasynda qaýipsizdik sharalarynyń saqtalmaýyna baılanysty dúken ıesine aıyppul salynǵanyn habarlaımyz, — delingen resmı jaýapta.
Eske salaıyq, jyl basynda Qyzylorda qalasynda sporttyq aıaq kıimder dúkeninde barlyq zatty jeńildikpen jappaı satylymǵa shyǵarýyna baılanysty halyq arasynda dúrbeleń týyndaǵan. Oqıǵaǵa baılanysty kásipker keshirim surady.
