1000 teńge 2014 jyldyń eń úzdik banknoty dep tanyldy
ASTANA. QazAqparat - Halyqaralyq banknot qaýymdastyǵynyń sheshimimen Kúltegin kóne túrki jazbalary beınelengen nomınaly 1000 teńgelik banknot 2014 jyldyń eń úzdik banknoty dep tanyldy. Tól teńgemiz mundaı halyqaralyq joǵary baǵany úshinshi jyl qatarynan ıelenip otyr, dep jazady 24.kz.
Shveıtsarııanyń Lozanna qalasynda ótken baıqaýǵa álemniń túrli aqsha úlgileri usynylǵan. Olardyń qatarynda 100 AQSh dollary, jańartylǵan 5 eýro jáne reseıdiń Sochı Olımpıadasyna arnalǵan mereıtoılyq banknoty bar.
Táýelsiz sarapshylar Kúltegin kóne túrki jazbasy beınelengen nomınaly 1000 teńgelik eskertkish banknottyń biregeı sapasy men dızaınyn joǵary baǵalaǵan. Jıyrmadan asa qorǵanysh belgileri bar eskertkish banknotty Ulttyq banktiń dızaınerleri Meńdibaı Alın men Dastan Mashrapov tarıh mamandarymen keńese otyryp jasaǵan.
On mıllıon danamen basylyp shyqqan banknottyń qorǵanysh dárejesi jetildirilgen. «Jyljymaly sýret, tústerdiń aýysýy, ásirese beıneniń qyrynan qaraǵanda shyǵyńqy ornalasýy - teńge jasaý tehnologııasynda alǵash ret qoldanylyp otyrǵan ádis, - deıdi mamandar.
Aqsha dızaınyn jasap shyǵýǵa 2 jyldaı ýaqyt ketedi eken. Sapa úshin tókken ter nátıjesiz emes. Qazaqstanda 1 mln. dana aqshaǵa bir ǵana jalǵan aqshadan keledi eken. Teńge banknottarynyń halyqaralyq baıqaýda júlde alǵany birinshi ret emes. Quramynda 90 memleketten 2000-ǵa jýyq sarapshy engen halyqaralyq banknot qaýymdastyǵynyń sheshimimen 2011 jyly nomınaly 10 myń teńgelik banknot úzdik dep tanylsa, 2012 jyly 5 myń teńgelik banknot ta joǵary baǵalanǵan edi.
