1000-nan astam aýyl sharýashylyǵy taýaryn óndirýshiler erte qarjylandyrýǵa ótinim berdi
ASTANA.KAZINFORM - Bıyl «Keń dala 2» baǵdarlamasy boıynsha ótinim qabyldaý 1 qazanda bastaldy. Búgingi tańda jalpy somasy 149,6 mlrd teńge bolatyn 1 myńnan astam aýyl sharýashylyǵy taýaryn óndirýshileriniń tizimi jasaqtaldy.
Aýyl sharýashylyǵy mınıstrligi málimetinshe, erte qarjylandyrý agrarlyq sala ókilderine keler jylǵy aýyl sharýashylyǵy maýsymyna tıimdi daıyndalýǵa, janar-jaǵarmaıdy tıimdi baǵamen alýǵa, tyńaıtqysh satyp alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa múmkindik beredi. Osy kezeńde qarjylyq resýrstarǵa qoljetimdilik – egis naýqanyn tabysty ótkizýdiń negizgi sharttarynyń biri.
Baǵdarlama boıynsha jyldyq 5%-ben jeńildikpen syıaqy mólsherlemesi kózdelgen. Bólingen qarajatty egis jumystaryna daıyndyqqa, jınaý jumystaryn júrgizýge, sondaı-aq maýsymdyq shyǵyndardy óteýge baǵyttaýǵa bolady. Kepilmen qamtamasyz etý máselesinde qıyndyqtary bar aýyl sharýashylyǵy taýaryn óndirýshiler úshin kepildik berý múmkindigi qarastyrylǵan: qaryz somasynyń 85%-yna deıin «Damý» qorynyń kepildigimen qamtamasyz etiledi.
Qarjylandyrý Agrarlyq nesıe korporatsııasynyń fılıaldyq jelisi jáne elimizdegi seriktes qarjy ınstıtýttary arqyly júzege asyrylady.
Agrarlyq nesıe korporatsııasy iske asyryp otyrǵan keshendi tásil aımaqtarǵa qaramastan fermerlerge qoldaýdyń qoljetimdiligin jáne jedeldigin qamtamasyz etedi.
Bul agrarlyq sektordyń turaqtylyǵyn arttyrýǵa jáne maýsymdyq dala jumystaryn ýaqytyly júrgizýge yqpal etedi.
Baǵdarlama jónindegi tolyq aqparat Agrocredit.kz saıtynda ornalastyrylǵan. Sondaı-aq keńes alý úshin Call-ortalyq nómirleri: 5353 (Kcell, Activ, Beeline) jáne +7 775 007 68 07 (Tele2, Altel) arqyly habarlasýǵa bolady.
Memleket basshysy Qasym-Jomart Toqaev Úkimet pen qarjy ınstıtýttarynyń aldyna kóktemgi egis jumystaryn ýaqytynda qolǵa alý týraly mindet qoıǵan bolatyn. Osy tapsyrmany júzege asyrý jáne qoldaý sharalaryn jetildirý boıynsha júıeli jumystar aıasynda bıyl «Keń dala 2» baǵdarlamasyna ótinim qabyldaý 2025 jylǵy 1 qazannan bastaldy.