1000-ǵa jýyq mektepte zamanaýı pándik kabınetter ornatylǵan
ASTANA. KAZINFORM – Memleket basshysynyń tapsyrmasy boıynsha shaǵyn qalalarda, aýdan ortalyqtarynda jáne aýyldyq jerlerde mektepterdi jańǵyrtý jumystary jalǵasyp jatyr.
2024 jyldyń qorytyndysy boıynsha 967 mektepte rekordtyq sany — 1621 robototehnıka, hımııa, bıologııa, fızıka jáne STEM-pánder boıynsha zamanaýı pándik kabınetter jabdyqtalǵan. Onyń ishinde 601 mektep aýyldyq jerlerde, 366 mektep qalalarda ornalasqan. Bul mektepterde 760 myńnan astam oqýshy bilim alady.
2029 jylǵa qaraı keminde 7000 zamanaýı pándik kabınetter ashý josparlanǵan.
— Memleket jyl saıyn mektepterdi salýǵa jáne jańǵyrtýǵa qarajat bóledi. 2023 jyldan bastap 2039 mektepte 3128 zamanaýı pándik kabınet jabdyqtaldy, — deıdi Infraqurylymdy damytý departamentiniń dırektorynyń orynbasary Roza Sembaeva.
Sonymen qatar elde ınklıýzııany qoldaý kabınetteri qarqyndy ashylýda. Búgingi tańda elimizde 1080 qoldaý kabıneti jumys isteıdi, onyń 216-sy 2024 jyly ashylǵan. 2025 jyldyń sońyna deıin barlyq balalar úshin qoljetimdi jáne jaıly oqytýdy qamtamasyz etetin taǵy 83 kabınetti iske qosý josparlanyp otyr