100 jylqynyń daýy: aqtóbelik jylqyshyǵa páter syıǵa berildi
AQTÓBE. KAZINFORM — Búgin aqtóbelik kásipker sottalyp, keıin raqymshylyqqa ilikken jylqyshy Rahat Sársenovke baspana kiltin tapsyrdy. Al onyń aýyldaǵy úıiniń ózi kepilde tur. Kazinform tilshisi Sot kabınetindegi azamattyq istiń sheshimimen, qylmystyq isterdiń úkimimen tanysty.
Rahat Sársenovtiń óz úıi Muǵaljar aýdany Saǵashıli aýylynda. Biraq qazir jalǵyz baspanasynyń ózi kepilde tur. Ony alýy úshin 10 mln teńge tóleýi tıis. Nege?
Azamattyq is
Azamattyq istiń sheshimi bıyl 3 sáýir kúni shyqty. Іs materıalyna súıensek, 2019 jyly sharýa qojalyǵynyń ıesi Tájiǵalı Eleýov pen Rahat Sársenovtiń arasynda shyǵyndy óteý týraly kelisim júrgizilgen. Kelisim boıynsha Rahat Sársenov 2014 jyldyń 20 naýryz aıynan bastap jylqyshy bolyp eńbek etken. 2018 jyly 60 bas jylqy joǵalyp, shyǵyn 10 mln teńge bolǵan. Ekeýi kelisip, Rahat Sársenov shyǵyndy óteýge ýáde etken. Osydan keıin Rahat Sársenov óz jumysyn jalǵastyrady jáne aldaǵy bes jylda eshqaıda aýyspaıtynyn aıtady. Muǵaljar aýdany Saǵashıli aýylyndaǵy úıdi kepilge qoıady. Kelisim notarıýs arqyly rastalǵan. Sharýashylyq ıesi Tájiǵalı Eleýov bıyl osy kelisim negizinde azamattyq talap aryz túsiredi, qaryzdy óteýdi surady.
Sot kabınetindegi aqparatqa súıensek, Tájiǵalı Eleýov 1993 jyly Muǵaljar aýdanynyń Jalǵyz aǵash jerinde «Taıbýryl» ShQ qurady. Sharýashylyqta asyl tuqymdy shamamen 2 500 bas jylqy bolady. Kásipti qaıta jandandyrǵanda eki úıirdiń birine jylqyshy Rahat Sársenov ıe bolady. 2019 jyly sanaqta 60 bas jylqy, al 2024 jyly 40 bas jylqy jetpegen. Saǵashılidegi úıdi bir kezderi ózi alyp bergen. Rahat Sársenov bolsa joǵalǵan jylqy jaıyn bilmeıminin, al notarıýsta qol qoı degen jerge ǵana óz qoltańbasyn qoıǵanyn aıtqan. Muǵaljar aýdandyq sotynyń sheshimen talap aryz ishinara qanaǵattandyryldy. Sot Tájiǵalı Eleýovtiń paıdasyna 10 mln teńge óndirý sheshimin shyǵardy.
Qylmystyq is
Al qylmystyq is úkimi bıyl 15 mamyr kúni shyqty. Іs materıalynda súıensek, 2019 jyly qojalyq ıesi Tájiǵalı Eleýov jylqyshy Rahat Sársenovke 360 bas jylqy tapsyrǵan. 2023 jylǵy 14 mamyrda saǵat 15:00 shamasynda Muǵaljar aýdany Eńbek aýyldyq okrýgine qarasty Jalǵyz aǵash malshy núktesinde ornalasqan «Taıbýryl» sharýa qojalyǵyna E. J. Amıralın kelip, bir bas jylqy alǵysy kelgenin aıtqan.
Sot kabınetindegi aqparatqa súıensek, Rahat Sársenov jylqyny 500 000 teńgege satyp jibergen. 2019 jylǵy 1 mamyr men 2024 jylǵy 2 qańtar aralyǵynda 39 bas jylqyny talan-tarajǵa salyp jymqyrǵan. Aıyptaý aktisi boıynsha Qylmystyq kodekstiń 189-babynyń 4-bóliginiń 2-tarmaǵynda kórsetilgen qylmystyq quqyq buzýshylyqty jasap, saldarynan Tájiǵalı Eleýovke jalpy 30 000 000 teńge bolatyn asa iri mólsherde múliktik zalal keltirgen. Sotta Rahat Sársenov taǵylǵan aıypty tolyq moıyndamady. Bir bas jylqyny mine turýǵa bergenin, al 39 bas jylqy týraly múlde estimegenin aıtty. Sebebi sanaqqa ózi qatyspaǵan. Jylqy baǵyp júrgende mal urlaný, joǵalý faktisi bolmaǵan. Sotta birneshe adam kýálik etken. Biri Rahat Sársenovtiń moıyndaǵanyn aıtsa, endi biri sanaq júrgizilgen sátte janynda bolmasa da qujatqa qol qoıǵanyn jasyrmady. Sot úkimimen Rahat Sarsenov QK-niń 189-babynyń 4-bóliginiń 2-tarmaǵynda kórsetilgen qylmysty jasaǵany úshin kináli dep tanylyp, 7 jyl merzimge bas bostandyǵynan aıyrý jazasy taǵaıyndaldy. Jazasyn qylmystyq-atqarý júıesiniń qaýipsizdigi ortasha mekemesinde óteý belgilendi. Sonymen birge azamattyq talapker Tájiǵalı Eleýovtyń paıdasyna 30 000 000 teńge óndirildi.
Apellıatsııalyq saty
Aqtóbe oblystyq sotynyń qylmystyq ister jónindegi sot alqasy qaýlyny 30 shilde kúni shyǵardy. Sot otyrysynda qorǵaýshy advokat G.Ipatov úkimniń kúshin joıyp, Rahat Sarsenovty aqtaýdy surady. Jylqylardy satqanyn, aıyrbastaǵanyn, jasyrǵanyn, soıǵanyn nemese óz paıdasyna jaratqanyn rastaıtyn birde-bir dálel bolmaǵan. Muǵaljar aýdandyq soty tek mal sanynyń jetispeý faktisin negizge alǵan.
Jylqynyń naqty qandaı jaǵdaıda joǵalǵany anyqtalmaǵan, tabıǵı shyǵynǵa ushyraýy, qyrylýy, urlanýy nemese basqa sebepteri tolyq tekserilmegen. Apellıatsııalyq sotta prokýror sottalýshy Rahat Sarsenovtyń is-áreketin Qylmystyq kodekstiń 189-babynyń 1-bóligine qaıta saralaý qorytyndysyn oqydy. Sot alqasy QR QPK-niń 431-baby 1-bóliginiń 2-tarmaǵyn, 443-444-baptaryn basshylyqqa alyp, Muǵaljar aýdandyq sotynyń 2026 jylǵy 15 mamyrdaǵy úkimin ózgertti. Rahat Sársenovtiń is-áreketin Qylmystyq kodekstiń 189-babynyń 4- bóliginiń 2-tarmaǵynan Qylmystyq kodekstiń 189-babynyń 1-bóligine qaıta saralady. Oǵan 6 aı merzimge bas bostandyǵynan shekteý jazasy taǵaıyndaldy. 2025 jyldyń 23-maýsymyndaǵy «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» Zańynyń 3-babynyń 1-bóligine sáıkes jaza 3 aıǵa qysqartyldy.
