100 jastaǵy soǵys ardageri ShQO-nyń qurmetti azamaty atandy
ÓSKEMEN. QazAqparat – 100 jastaǵy soǵys ardageri Ábdiǵalı Qaımoldın Shyǵys Qazaqstan oblysynyń Qurmetti azamaty atandy, dep habarlaıdy QazAqparat tilshisi.
Oblystyq máslıhattyń kezekten tys sessııasynda depýtattar bıyl 100 jyldyq mereıtoıyn atap ótip jatqan Uly Otan soǵysynyń ardageri, Stalıngrad, Harkov jáne Kenıgsberg túbindegi shaıqastarǵa qatysqan Ábdiǵalı Qaımoldınge óńirdiń «Qurmetti azamaty» ataǵyn berý týraly sheshim qabyldady.
Maıdanger 1921 jyly 30 maýsymda Abyraly aýdany Uzynbulaq aýylynda dúnıege kelgen. 1941 jyly mektepti bitirgennen keıin birden maıdanǵa jiberildi. Onda ol zeńbirekshi, zarıadtaýshy, sodan keıin tankke qarsy artıllerııada zeńbirek komandıri boldy. Stalıngrad shaıqasyna, Kenıgsberg bekinisi men Insterbýrg qamalyn basyp alýǵa qatysty. Qandy maıdanda tórt ret jaralanǵan.
«Soǵystan keıin Qaımoldındi Semeı ıadrolyq synaq polıgonyna qyzmet etýge shaqyrdy. Onda ol jabyq nysan kúzetin basqardy. Sodan soń Ábdiǵalı Qaımoldın Ulttyq qaýipsizdik organdarynda, aýdandyq komıtetterde jáne Keńes Odaǵy Kommýnıstik partııasynyń Semeı obkomynda eńbek etti», - delingen ShQO ákimi baspasóz qyzmeti taratqan aqparatta.
Ardagerdiń 37 nagradasy bar. Oǵan Qyzyl juldyz jáne Otan soǵysy ordenderi, «Kenıgsbergti alǵany úshin» medali, «Jaýyngerlik eńbegi úshin», «Jaýyngerlik erligi úshin» medalimen jáne taǵy basqa da nagradalar berilgen.
Ábdiǵalı Qaımoldın eńbek demalysynda bolsa da QR UQK ujymymen jáne ardagerler keńesimen únemi baılanysta. Jas qyzmetkerlerge dáris oqyp, tájirıbesimen bólisip turady.
