100 jastaǵy qarııa uzaq jasaýdyń qupııasyn aıtty - Aqtóbe
ASTANA. QazAqparat - Aqtóbelik Aıjamal Myrzaǵalıeva búgin 100-ge toldy. Bir ǵasyr jasaǵan keıýana uzaq ómir súrýdiń qupııasy eńbek pen durys oılaý ekenin aıtady, dep habarlaıdy QazAqparat.
- Jastaıymnan eńbekke aralastym. On jeti jasymnan kolhozdyń sıyryn saýdym. Qazirgideı myna jumys unaıdy, mynany jasamaımyn degen bolǵan joq. Sıyr saýýdan bosasaq, shómele úıdik. Qol qýsyryp qarap otyrmadyq. Eńbektegen baladan eńkeıgen kárige deıin eńbek etken zaman boldy. Allanyń mańdaıyma jazǵany shyǵar, osy ómirime shúkir deımin, - deıdi Aıjamal Myrzaǵalıeva.
100 jasaǵan áje áli tyń, ózi júrip-turady. Úlken kisiniń jasyn bersin dep, bata suraıtyndar kóp. Sondyqtan, eshkimniń kóńilin qımaıtyn áje toı-tomalaqtan qalmaýǵa tyrysady. Kelinderi Aıjamal apa jasy 75-ke kelgenshe sıyr saýyp, úıdiń sharýasyn dóńgeletip otyrǵanyn da jasyrmady. Qazir Aıjamal apanyń balalarynyń aldy 82 jasta. 17 jasynda otasqan jubaıy Orazǵalı aqsaqal 24 jyl buryn baqılyq bolypty. Qazir qarııa jeti baladan 16 nemere, 27 shóbere, 7 shópshek súıip otyrǵan jaıy bar.
- Shal ekeýimiz úkimettiń jumysy dep júrdik. Balalardy baǵyp-qaǵýmen enem aınalysty. Ájeniń tárbıesin alǵan bala jaman bolmaıdy,- deıdi Aıjamal Myrzaǵalıeva.
Aıjamal áje ádemilikti jany súıedi. Átirin seppeı, qonaqqa barmaıdy. Talǵampaz qarııa ıissýlar kollektsııasyn jıi aýystyryp turady eken. Taǵy bir qasıeti- sándi kıinip júrgendi unatady. Sondyqtan, ájeleriniń syryn bilip alǵan nemereleri, kelinderi syılyq tańdarda esh qınalmaıdy.
- Ájem óte sánqoı. Ádemi matadan qalaǵanyn tigip alady. Jipti de ınege ózi sabaqtaıdy,- deıdi nemeresi.
100-ge tolǵan qarııany búgin Aqtóbe qalasynyń ákimi Іlııas Ispanov quttyqtap, syı-sııapat jasady.
Aqtóbede 100-den asqan 19 qart turady.
Zada Zeıin
