100 jastaǵy atyraýlyq keıýana soǵys kezinde temirjol salýǵa qatysqan

ATYRAÝ. KAZINFORM — Atyraý oblysynda Ekinshi júnıejúzilik soǵys kezinde temirjoldy qalpyna keltirýge qatysqan Uljan Temirbolatova turady. Jaqynda ol 100 jasqa toldy. Ol 1925 jyly Inder aýdanyndaǵy Jarsýat aýylynda ómirge kelgen. Qujatyndaǵy týǵan kúni — 25 aqpan.

— Bala kezimiz asharshylyqpen tuspa-tus keldi. El ishinde isherge tamaq tabylmaǵan kezde úlkender Jaıyq ózeninen balyq aýlady. Odan keıin qýǵyn-súrgindi de kórdik. Endi es jııamyz-aý dep júrgende, soǵys órti lap ete tústi. Osy kezde er-azamattyń bári maıdanǵa attanyp, áıelder men jasóspirimder aýyr eńbekke aralasty. Ásirese analarymyz kúni-túni jumys istep, bar qıyndyqty taısalmaı kóterdi, - dep eske aldy Uljan Temirbolatova. 

Jastaıynan aýyr eńbekpen shyńdalǵan ol temirjol salý isine qatysqan. Fashıster Reseı Federatsııasynyń Astrahan oblysyndaǵy temirjoldy buzyp ketken. Sol kezde Uljan Temirbolatova 10-ǵa jýyq qurbysymen birge sol óńirdegi temirjoldy qalpyna keltirýge jiberilgen.

— Jumystyń jeńili bolmaıdy ǵoı. Temirjol salý óte qıyn eken. Ásirese buǵanamyz áli qata qoımaǵan jasóspirim shaqtaǵy topyraq tasyǵanymyz, aýyr relsterdi qolmen tósegenimiz áli esimnen ketpeıdi. Balǵanyń salmaǵy aýyr edi. Tóbemizden jaý ushaǵy ushqanda, tyǵylatyn qalqa taba almaı, jan-jaqqa qashamyz. Jaý ushaǵynyń daýysy masanyń yzyńy sekildi estiledi. Ózimiz aldyna ala qazyp qoıǵan shuńqyrǵa tyǵylýǵa májbúr bolamyz. Іshetin tamaq ta, kıetin kıim de tapshy. Búgingi urpaǵymyz sondaı qıyndyqty kórmegenin qalaımyn, - deıdi Uljan Temirbolatova.

Keıin surapyl soǵystan oralǵan maıdanger Mátjan Ǵubaıdýllınmen otaý qurǵan. Olar 2 ul, 3 qyz dúnıege ákelip, tálimdi tárbıe berdi. 

Al 1957 jyly otbasymen Qyzylqoǵa aýdanynyń ortalyǵy — Mııaly aýylyna qonys aýdarǵan. Kúıeýi burynǵy «Selhoztehnıka» mekemesinde jumys istegen. Al ózi «PMK-907» mekemesiniń sylaqshysy bolǵan.

Ǵasyrlyq belesti baǵyndyrǵan Uljan Temirbolatova 5 perzentinen 40-tan astam nemere-jıen men shóbere kórip otyr. Byltyr oǵan «Qyzylqoǵa aýdanynyń qurmetti azamaty» ataǵy berilgen. 

Kelini Jazıra Esenǵazynyń aıtýynsha, 100 jastaǵy keıýana dalaǵa eshkimniń kómeginsiz shyǵady. Maldyń jaıyn surap otyrady. 

— Ájemizdiń densaýlyǵyna shaǵym aıtpaıdy. Nemere-shóbelerin mańdaıynan súıip, jıi erkeletedi. Kún saıyn batasyn berip, áýletimizdiń berekesin arttyryp otyr, - deıdi Jazıra Esenǵazy. 

Qazir ǵasyr jasaǵan ananyń balalarynyń úlkeni 75 jasqa tolǵan. Odan keıingisi 60 jastan asqan. 

— Adamnyń qansha ǵumyr súretini bir Allaǵa ǵana aıan ǵoı. Jumys aýyr bolsa da erinbedik, adal eńbek ettik. Balalarymyz aman ósip, úbirli-shúbirli bolsa eken dep tiledim. 100 jasqa tolamyn degen oıym bolǵan joq. Bul — jas kúnimdegi kórgen beınetimniń zeıneti shyǵar, - deıdi Uljan Temirbolatova.

Nemeresi Talǵat Ǵubaıdýllınniń pikirinshe, ájesi bata jattatyp, úlkenderdiń áńgimesin tyńdatady. 

— Ájemizdi qonaqqa da, toıǵa da shaqyrýshylar kóp. Sondaı qonaqtyqqa da, toıǵa da nemerelerin ertip barady. Úlkenderdiń áńgimesin tyńdaımyz. Olar bizge bata beredi. Ájemiz bata jattatyp, ónegeli áńgimesin aıtady, - deıdi Talǵat Ǵubaıdýllın. 

Eske sala ketelik, atyraýlyq kran mashınısi Bahytgúl Sanqybaevanyń qarapaıym jumysshylarǵa qoldaýdy sezindim degenin jazǵan bolatynbyz.