100 jas serjant Qarýly kúshter qataryna qosyldy
ASTANA. KAZINFORM — Qorǵanys mınıstrliginiń Keńes Odaǵynyń Batyry, Halyq qaharmany, armııa generaly Saǵadat Nurmaǵambetov atyndaǵy Áskerı kolledjinde oqýdy aıaqtaýǵa arnalǵan saltanatty rásimi ótti.
Bıyl áskerı oqý ornyn 100 kadet támamdap, kásibı serjanttar korpýsynyń qataryna qosyldy.
Saltanatty is-sharaǵa Qorǵanys mınıstrliginiń basshylyq quramy, Qarýly kúshterdiń ardagerleri, áskerı qyzmetshiler, túlekterdiń ata-analary men jaqyndary qatysty.
Dástúrge saı oqý bitirýshiler Keńes Odaǵynyń Batyry, Halyq qaharmany, Qazaqstan Respýblıkasynyń Tuńǵysh Qorǵanys mınıstri armııa generaly Saǵadat Qojahmetuly Nurmaǵambetovtyń eskertkishine gúl shoqtaryn qoıyp, ult maqtanyshyna taǵzym etti.
Іs-shara barysynda Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov jas túlekterdi quttyqtap, Otan aldyndaǵy abyroıly qyzmetterine tabys tiledi.
— Halyq qaharmany, armııa generaly Saǵadat Nurmaǵambetov atyndaǵy bilim ordasy úshin — búgin erekshe kún. Bul jańa býynnyń sapqa qosylý kúni. Búgin túlekterimizdiń ishinen oqýda, áskerı-tártipte jáne qoǵamdyq ómirde erekshe kózge túsip, kolledjdi úzdik dıplommen aıaqtap otyrǵan segiz oqý ozaty bar. Úzdik dıplomdar bolashaq minsiz ofıtserlik jáne serjanttyq mansaptaryńyzdyń berik irgetasy. Endi osy bıikten túspeńizder. Sizderge zor jaýapkershilik júktelip otyr. Áskerı sert berdińizder, endi Otanǵa degen adaldyq ómirlik baǵdarlaryńyz bolýy tıis, — general-maıor Asqar Mustabekov.
Saltanatty rásim aıasynda jas serjanttar Qazaqstan Respýblıkasy Qarýly kúshteri serjantynyń ar-namys kodeksin qabyldap, serjanttar korpýsyna qabyldaý rásiminen ótti. Bul — áskerı qyzmetke adaldyqty, joǵary jaýapkershilik pen kásibı mindetke beriktikti aıqyndaıtyn mańyzdy áskerı dástúr.
— Osy aıtýly kúnde bizge sapaly bilim, temirdeı tártip jáne otanǵa degen sheksiz mahabbatty boıymyzǵa sińirgen kolledjdiń basshylyǵyna, ustazdarymyzǵa, komandırlerge barlyq túlek atynan alǵysymdy aıtamyn. Sizder bizdi zamanaýı áskerı bilimmen sýsyndatyp qana qoımaı, Baýyrjan Momyshulynyń taktıkalyk kóregendiligi men Saǵadat Nurmaǵambetov atamyzdyń memleketshildik uly qasıetin boıymyzǵa sińirdińizder. Biz Qarýly kúshterdiń jańa býynymyz, Otan aldynda bergen áskerı antymyzǵa ómir boıy adal bolýǵa ýáde beremiz, — dedi oqý úzdigi serjant Ómirjan Tasbolatov.
Bul kúni jas serjanttardyń ata-analary da tolqynystaryn jasyra almaı, perzentteriniń jetistigine shyn qýandy.
— Baýyr eti balalarymyz búgin serjant atanyp jatyr. Úlken jolǵa qadam basqan barlyq túlekke sáttilik serik bolsyn. Otan qorǵaý sátinde abyroılary bıik bolsyn, — dedi ata-ana Nursulý Óteýliqyzy.
Saptyq defıle kórsetý barysynda áskerı qyzmetshiler qımyldarynyń dáldigimen jáne qarýdy minsiz meńgerýimen kórermenderdi tánti etti.
Іs-shara áskerı orkestrdiń súıemeldeýimen joǵary deńgeıde ótti. Merekeniń shyraıyn dástúrli merekelik vals asha tústi. Jas serjanttar bal kóılekterin kıgen arýlarmen vals bılep, gúl shoqtaryn tartý etti.
Іs-shara Qarýly Kúshter Ulttyq áskerı-patrıottyq ortalyǵy shyǵarmashylyq ujymynyń oryndaýyndaǵy áserli ánmen jáne sýretke túsý rásimimen qorytyndylandy.
Aıta ketelik Qorǵanys mınıstrligi áskerde namaz oqýǵa qatysty málimdeme jasaǵan edi.
