100 jańa oqýlyq: jańa oqý jylyna taǵy 30 oqýlyq ázirlenedi

ASTANA. QazAqparat - «100 jańa oqýlyq» jobasy aıasynda álemge úzdik dep tanylǵan taǵy 30 oqýlyq qazaq tiline aýdarylady, dep habarlaıdy QazAqparat tilshisi.

Bul týraly Ulttyq aýdarma bıýrosynyń atqarýshy dırektory Raýan Kenjehanuly Astanada Jastar jylynyń resmı ashylýynda málimdedi.

«Qurmetti Elbasy, ótken jyly sizge «100 jańa oqýlyq» jobasymen aýdarylyp basylǵan alǵashqy 18 oqýlyqty tanystyrdyq. Árqaısysy elimizdegi 115 joǵary oqý ornyna 10 myń danamen taratyldy. Oqýlyqtardyń elektrondy nusqasy Internet arqyly erkin qoldanysqa berildi. Sonyń arqasynda bul joba az ǵana ýaqytta elimizdiń barlyq oqý oryndary, oqytýshylary men stýdentterine álemniń eń ozyq bilim men ǵylym ortalyqtarynyń altyn qoryn ashyp berdi», - dedi Raýan Kenjehanuly.

Onyń aıtýynsha, dúnıe júziniń eń bedeldi ǵalymdarynyń álemge mıllıondaǵan danamen taralǵan kelesi 30 oqýlyǵy qazaq tiline aýdarylyp jatyr. Bul oqýlyqtar da taıaý arada basylyp, jańa oqý jylynda stýdentterdiń qolyna tıedi.

Aýdarmamen qatar, jetekshi mamandar men oqytýshylardyń vıdeodáristeri qamtylǵan onlaın-kýrstar da ázirlenip jatyr.

«Vıdeodárister konspektilermen, jattyǵýlarmen jáne bilimdi tekseretin suraq-jaýaptarmen tolyqtyrylǵan. Jańa oqýlyqtar negizdelip jasalǵan onlaın-kýrstar «Astana ashyq ýnıversıteti» atty jańa bilim berý jobasynyń negizi bolady», - dedi R. Kenjehanuly.

Aıta keteıik, R. Kenjehanuly Qazaqstanda álemniń jetekshi ýnıversıtetteriniń onlaın-kýrstaryn qoljetimdi etetin «Astana ashyq ýnıversıtetiniń» ashylatynyn málimdedi.

Jastar jylynyń resmı ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.

Eske sala ketsek, QR Prezıdenti Nursultan Nazarbaev Qazaqstan halqyna kezekti Joldaýynda 2019 jyldy Jastar jyly dep jarııalaýdy usynǵan bolatyn.

Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.