«100 jańa esimge» engen kásipker jalǵyzbasty anaǵa baspana syılady
Baspana taýqymetin tartqan jalǵyzbasty ana Aıgúl Sadyqova úsh balasymen birge jyldar boıy aýyldaǵy ǵımarattyń bólmesin jaldap kelgen. Januıaǵa turaqty qamqorlyq kórsetip kelgen Qazyǵurt aýdanynyń basshylyǵy olarǵa demeýshi taýyp berdi. Jergilikti kásipker qolynda múmkindigi shekteýli bala bar A.Sadyqovaǵa 4 bólmeli úı salyp berdi.
«Bolashaq» móltek aýdanynda ornalasqan jańa úı jaryqpen jáne tabıǵı gazben qamtylyp, aýyzsý tartylǵan. Óńirde qarqyn alǵan «Qamqorlyq» jobasy aıasynda Qazyǵurt aýylynyń kásipkerleri jumyssyz ananyń jańa qonysyna úı-jıhazdaryn tartý etip, azyq-túlik alyp berdi.
Basybaıly baspana buıyrǵan otbasyndaǵy balalardyń qýanyshynda shek joq. Jyldar boıǵy qıyndyqtan arylǵan jandardyń aıtar alǵysy mol.
«Qazaqstandaǵy 100 jańa esim» qataryna shynaıy el patrıoty retinde engen Qazyǵurt aýdanynyń kásipkeri Syrym Ertaev osyǵan deıin de birneshe jerlesine baspana syılap, jomarttyǵymen tanylǵan. Úlgi bolar isimen alǵys arqalaǵan azamat jeke kásibin dóńgeletip, kóptegen turǵyndy turaqty jumyspen qamtyp otyr.
Túrkistan oblysynda júzege asyp jatqan «Qamqorlyq» baǵdarlamasy ózińde bardy ózgemen bólisý, muqtaj, kóńili jarym jandarǵa qol ushyn berýdi meńzeıdi. Qazyǵurt aýdany boıynsha 86 otbasyna osy baǵdarlama aıasynda jetekshi bekitilip, jan-jaqty kómek kórsetilgen. Aq tileýli azamattar áleýmettik jaǵdaıy tómen jandarǵa turmysqa qajetti zattaryn, kómir, otynyn molynan úılestirýde. Atalǵan sharaǵa aýdan, qala jáne aýyl ákimdikteri, «Nur Otan» partııasy Túrkistan oblystyq fılıalynyń belsendileri, máslıhat depýtattary men kásipkerler demeýshilik jasap, atsalysyp jatyr. Jalpy, oblys boıynsha 2 myńǵa jýyq otbasyna joba aıasynda jan-jaqty qamqorlyq jasalmaq.
