«100 jańa esimge» engen azamattardy shetelge de tanytýǵa tyrysamyz - Evgenıı Kochetov
Bul týraly QR Aqparat jáne kommýnıkatsııalar mınıstrliginiń kezekti otyrysynda «Qazkontent» AQ basshysy Evgenıı Kochetov málim etti, dep habarlaıdy «QazAqparat» HAA tilshisi.
«Joba úzdik azamattardy irikteýmen shektelmeıdi. Eń basty jumystardyń bári alda. Endigi kezekte biz «Qazaqstannyń 100 jańa esimine» engen azamattardy elge tanytý jumysymen aınalysamyz. Kezdesýler, talqylaýlar, arnaıy kitaptardyń, sonymen birge derekti fılmderdiń jaryqqa shyǵýy arqyly jumys júrgizemiz», - deıdi «Qazkontent» AQ-nyń basshysy Evgenıı Kochetov.
Onyń aıtýynsha, úzdik júzdikten kóringen azamattardy shetelge de tanytý jumystary nazardan tys qalmaıdy.
«Іriktelgen azamattardyń esimi el tarıhyna ene otyryp, Qazaqstannyń budan keıingi býyny úshin olar úlgi bolady. Olardyń esimin el ishinde ǵana emes, shetelge de tanytýǵa tyrysamyz», - deıdi Kochetov.
Eske sala ketsek, 1 jeltoqsan kúni QR Prezıdenti Nursultan Nazarbaev «Rýhanı jańǵyrý» baǵdarlamasy aıasynda uıymdastyrylǵan «100 jańa esim» jobasynyń 102 jeńimpazymen kezdesken bolatyn. Qazaqstannyń týyn bıikke kótergen sportshylar men aq halatty dárigerler, metsenattyqpen kózge túsken beldi kásipkerlermen ǵalymdar, mádenıet pen qoǵamdyq salada el aýzynda júrgen azamattar Elbasynyń jyly lebizine bólengen edi.
