«100 jańa esim» jobasynda qoǵam qabyldaı alatyn adamdarǵa daýys berý kerek - Erlan Saırov
Atap aıtqanda, «Qazaqstannyń 100 jańa esimi» jobasyna onlaın túrde 100esim.el.kz saıtynda daýys berý 18 qazanda bastalyp ketti. Jobaǵa qatysyp jatqan 302 adamnyń arasynda mádenıet salasy boıynsha 32 adam, qoǵam boıynsha 83, bıznesten - 51, medıtsınadan - 46, ǵylymnan - 47, sport boıynsha 43 úmitker bar. Eske sala ketsek, onlaın túrde daýys berý 10 qarashada aıaqtalady.
El.kz ınternet jobasynyń jetekshisi Bella Orynbetova daýys berýge jiberilgen 302 adam bekitilgen talaptarǵa saı keletinin alǵa tartty. Olardyń ishinde eń jas úmitker shahmatshy Ásel Serikbaı bolsa, al jasy eń úlken úmitker retinde 76 jastaǵy ǵalym Maıdan Súleımenov tirkelgen. Jalpy, osy jobaǵa ótinishterdi qabyldaý kezinde múmkindigi shekteýli jandardan óte kóp ótinishter kelip tústi. Olardyń arasynda eleýli jetistikteri bar azamattar az emes.
«Biz batys elderi nasıhattap júrgen túrli batyrlarǵa elikteı bastadyq. Balalarymyz «Spaıdermen» nemese «Betmen» sekildi keıipkerlerge eliktep júrgeni anyq. Qazirgi kezde elimizde endi qaı tulǵany úlgi tutqandy jón kórseńiz, sol adamdarǵa daýys bergenińizdi qalar edim. Sondyqtan daýys berý naýqanynda el turǵyndary shynaıy «100 jańa esimge» laıyq adamǵa daýys bersin degen ótinishimdi aıtar edim», - dep atap ótti Bella Orynbetova.
Óz kezeginde «Astana mádenıeti» jýrnalynyń Bas redaktory Qýandyq Shamahaıuly daýys berý naýqanynda ınternet qoldanýshylardyń belsendiligi óte mańyzdy ekenin qadap aıtty.
«Sebebi ár usynylǵan adamnyń ómirbaıanymen jete tanysyp, sodan keıin shyn daýys beretin adamyn ózderi tańdasa degen usynys bar. Qazir áleýmettik jelilerden, elektrondyq poshtadan «maǵan daýys berińizder» degen ótinishter kóp taraıtyny belgili. Úmitker degen adamdar týraly keńinen málimetter berilýi kerek dep oılaımyn, ıaǵnı olar týraly derekti fılmder kórsetilse, halyq bul azamattardy shynaıy tanýǵa múmkindik alady»,-deıdi Q. Shamahaıuly.
Sonymen qatar belgili saıasattanýshy Erlan Saırovtyń paıymynsha, oblystyq gazetter arqyly «100 jańa esimge» laıyqty azamattar týraly tolyq málimet berilýi kerek.
«Elimiz halqy sanasynyń jańǵyrýy bolýy úshin qoǵamda áleýmettik optımızm paıda bolýy kerek. Qoǵamda optımızm men pikir týdyratyn túrli azamattar bar. Meniń oıymsha, «100 jańa esimniń» ishinde Táýelsizdik alǵannan beri Qazaqstannyń ekonomıkasyna, saıası protsesterine úles qosqan, sonymen birge sońǵy 10 jyldyń ishinde elimizdiń áleýmettik optımızmin kóterýge óziniń úlesin qosqan azamattar bolýy tıis. Eń bastysy, erteń atalǵan 100 adamdy qoǵam qabyldaı ma? Osy jerde bizdiń kele jatqan jas urpaqqa oń áser etetin 100 esim bolýy qajet. Sondyqtan onyń mıssııasy búgin emes, ıaǵnı erteńgi jasóspirimderdi áleýmettik optımızmge tárbıelep, bolashaqqa jeteleý», - deıdi saıasattanýshy Erlan Saırov.
«Osyndaı halyqtyń esinde qalǵan keıipkerler búkil qoǵamdy áleýmettik ońtaıly áserge jeteleıdi. Ekinshi bir máselege toqtalsam, búginde aýyldy jerlerde halqymyzdyń 48 paıyzy turady. Al endi sol 100 esimniń ishinde geografııalyq jaǵynan qaraıtyn bolsaq, onyń 70-80 paıyzy qaladan shyǵýy múmkin. Sondyqtan geografııalyq turǵydan da bul máselege nazar aýdarý kerek. Búginde optımızm kimge qajet? Optımızm birinshi kezekte aýylda turatyn, eldi mekenderde eńbek etip júrgen, aýdandyq deńgeıde jumys istep júrgen azamattarǵa kerek. Sondyqtan olarǵa qoldaý qajet. Menińshe, 100 adamdy iriktegen kezde mindetti túrde ádilettilik ustanymdaryna aıryqsha mán berý mańyzdy. Ádilettilik qaǵıdasy bolmasa, qoǵam olardy qabyldamaıdy. Osy oraıda áleýmettik áli terrıtorııalyq ádilettilikti saqtaýǵa tıispiz»,-dep jetkizdi oıyn saıasattanýshy.
Onyń atap ótýinshe, búkil azamattyq qoǵam, turǵyndar, salalyq kásip ıeleriniń barlyǵy osyndaı is-sharaǵa mindetti túrde atsalysýy kerek. Atalǵan «100 jańa esim» elimizdiń ishindegi mádenı, rýhanı, áleýmettik úderisterdiń barlyǵyna úles qosatyn, sol basymdyqtardy ózderi alǵa jeteleıtin úlken tulǵalar bolýy qajet.
Budan bólek, «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalıuly jalpyulttyq tizimde kezdeısoq adamdar kezdespeýi kerektigin sóz etti.
«Bul jobanyń jaýapkershiligi óte zor. Eń bastysy, ol halyqty biriktiretin joba bolýy kerek qoı. Elbasy atap ótkendeı, óz qolymen, ónerimen, eńbegimen jetistikke jetken adamdar iriktelýi tıis. Osy oraıda Olımpıada oıyndarynda eleýli jetistikterdi kórsetken sportshylarymyz bar. Olar shyn máninde úlgi. Kásipker nemese múmkindigi shekteýli jandardyń arasynda úlgi tutatyn azamattar barshylyq. Bul azamattar búgingi kúnniń batyrlary. Bizdiń balalarymyz solarǵa qarap, boıyn túzeýi kerek»,-dedi B. Ábdiǵalıuly.
Esterińizge salk keteıik, bıyl sáýir aıynda QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda QR Prezıdenti «Qazaqstandaǵy 100 jańa esim» jobasyn júzege asyrýdy usyndy.
