«100 jańa esim» jobasy: pikirtalas qyza tústi
ASTANA. QazAqparat - Qoǵam belsendileri «100 jańa esim» jobasyna kimdi usyný kerek degen máselege qatysty qyzý pikirtalas júrgizýde. Jýyrda Ortalyq kommýnıkatsııalar qyzmetinde ótken basqosýda qoǵam belsendileri «100 jańa esimdi» halyq tańdaýy kerek degen toqtamǵa keldi.
«100 bıýro» bastamasy sheńberinde ótkizilgen kezdesýge qatysýshylar tizimge kirgen azamattardyń kútken senimdi aqtamaıýy múmkin degen de pikirlerin aıtty. MMA qaýymdastyǵy tóraǵasynyń orynbasary Anatolıı Kım: «Mysaly, men tálimger retinde ózim úmit artqan jas sportshynyń kandıdatýrasyn usynatyn bolsam, ol eń aldymen menen: «Munyń maǵan keregi ne?» dep suraıdy. Mine, meniń túsinbeıtinim, nege adamdar «Qazaqstandaǵy 100 jańa esim» jobasyna kirýge múddelilik tanytpaýy kerek?» degen saýal qoıdy.
Jýrnalıst Mahabbat Esenniń pikirinshe, jańa joba elimizdegi jańa talanttardy anyqtaýǵa kómektesedi. «Meniń túsinýimshe, bul joba eń birinshiden, aqparattyq naýqan. Óıtkeni, onyń birinshi kezeńinde osy jobaǵa laıyqty degen úmitkerlerdli tabý kerek. Kim bilsin, bálkim irikteý barysynda bizdiń qoǵamnan taǵy Dımash Qudaıbergen shyǵatyn shyǵar? Endeshe nege memleket sol talantty álemdik deńgeıdegi bedeldi baıqaýlarǵa jibermeıdi? Nemese qandaı da bir jas ǵalym shyqty delik. Nege biz onyń álemdik deńgeıdegi básekede jarqyrap kórinýine jol ashpaımyz?»,- degen oı-pikirin bildirdi ol.
Anatolıı Kım óz áriptesiniń ustanymymen kelispeıtinin ashyq aıtty. Onyń aıtýynsha, eger tańdalǵan úmitker úmitti aqtamasa dúıim jurttan uıat bolady. «Men kishkentaı Gennadıı Golovkınderdi kúnde kórip júrmin. Biraq olardyń qaısysy kúni erteń Golovkın sııaqty myqty sportshy bolatynyn eshkim de bilmeıdi. Mysaly, men sizderge keremet bir talantty sportshyny taýyp berdim delik. Úmit artyp, oǵan qyrýar aqsha jumsaımyz. Ártúri elderge, túrli jarystarǵa aparamyz. Al ol eshqandaı da úmitti aqtamasa she? Uıatqa qalmaımyz ba? Mıllıondardyń arasynan sýyrylyp shyǵyp, chempıon bolý árkimniń qolynan kele bermeıdi»,- dep túsindirdi óz oıyn A. Kım.
Al Májilis depýtaty Pavel Kazantsevtiń paıymdaýynsha, «100 jańa esim» jobasynyń túpki maqsaty - qoǵamnyń árbir múshesiniń óz jaqyn-jýyqtaryna degen qyzyǵýshylyǵyn oıatý. «Bul jerde kúmán da bolýy múmkin. Óıtkeni, irikteý, krıterııler jáne tańdaý degen úsh kezeń bolady. Biraq jobaǵa kimniń kiretinin qoǵamnyń ózi tańdaıdy»,- dedi ol.
Basqosýdyń nátıjesinde qoǵam belsendileri «Qazaqstannyń 100 jańa tulǵasy» jobasyna kirýge laıyqty?» degen saýalǵa jaýap beretin jumys tobyn qurýǵa sheshim shyǵardy. Osy jumys tobynyń músheleri úmitkerlerdi irikteý qalaı júrgiziletinin anyqtaıdy.
Esterińizge sala keteıik, elimizdegi «Qazaqstannyń 100 jańa tulǵasy» atty joba 2017 jyldyń 8 maýsymynda iske qosyldy. Birinshi kezeńde kraýdsorsıng negizinde ótinishter qabyldanady. Atap aıtarlyǵy, buǵan qalyń kópshilik keńinen tartylady. Bir ereksheligi, ómir joly men jetken tabystary aınalasyndaǵy jandardy shabyttandyratyn qazaqstandyqtar týraly kez-kelgen adam áńgimeleı alady. Ótinishterdi irikteýdegi eń basty krıterıı - usynylǵan adamnyń táýelsiz Qazaqstannyń damýyna naqty qosqan úlesi eskeriledi.
Ótinishter 100esim.el.kz saıtynda qabyldanady. Ol jerde jurtqa ashyq jaǵdaıda barlyq áńgimeler usynylady. Sol oqıǵalardyń ishinen unatqany bolsa kez-kelgen adam óziniń pikirimen áleýmettik jelilerde bólise alady. Saıyp kelgende, jumys toby men arnaıy komıssııa qoǵamdyq pikirdi eskere otyryp, «100 jańa esim» jobasynyń laıyqty qatysýshylaryn tańdaıdy.
