«100 jańa esim» jobasy aıasynda daýys berý merzimi aıqyndaldy

ASTANA. QazAqparat - «Qazaqstandaǵy 100 jańa esim» jobasy bıylǵy qazan-qarashada talqylaýǵa shyǵarylady. Bul týraly Astanada rýhanı jańǵyrý taqyrybyndaǵy halyqaralyq ǵylymı-tájirıbelik konferentsııa barysynda Eýrazııalyq ıntegratsııa ınstıtýtynyń dırektory Ǵanı Nyǵymetov málim etti, dep habarlaıdy QazAqparat.

«100 jańa esim» jobasy aıasynda biz óńirlerdi aralap keldik, osy oraıda árbir oblys ózderiniń esimderiniń tizimin quryp, respýblıkalyq ortalyqqa tapsyrdy. Búginde jalpyrespýblıkalyq tizim jasalyp jatyr jáne ol jalpy daýys berýge shyǵarylady. Qazaqstannyń árbir azamaty saıtta kórsetilgen laıyqty adamǵa daýys bere alady. Bul tizim aǵymdaǵy jylǵy qazan-qarashada talqylaýǵa shyǵarylady»,-dedi Ǵ. Nyǵymetov.

Sonymen qatar ol ınstıtýt tarapynan júrgizilgen zertteýlerge toqtalyp, jańǵyrý protsesine tıimdi yqpal etetin úrdisterdi anyqtaý boıynsha málimetterdi jarııa etti.

Onyń sózine qaraǵanda, qazaqstandyqtardyń 80 paıyzdan astamy Qazaqstannyń ilgeri damýy úshin qoǵamdyq sanany jańǵyrtý qajet dep sanaıdy.

Munymen qosa, qazaqstandyqtardyń paıymynsha, mádenıetti, jeke ulttyq kodty saqtap qalý - jańǵyrýdyń tabysty bolýyna negizgi jaǵdaı jasamaq. Saýalnamamen qamtylǵandardyń 79 paıyzy halyqtyq dástúr men saltty ustanǵandy ómirindegi mańyzdy quramdas dep baǵalady.

«Qazaqstandyqtar maqtan tutatyn qundylyqtardyń úshtigine toqtalatyn bolsam, onda beıbitshilik pen kelisim, etnıkaaralyq qatynastardaǵy úndestik, Qazaqstan halqynyń qonaqjaılyǵy sekildi qundylyqtar qamtylǵan. Respondettiń árbir besinshisi qazaqstandyq qoǵamnyń dástúrge uqypty qaraıtyndyǵyn maqtan tutady eken»,-dedi ol.