«100 jańa esim jeńimpazy» sekseýildi zııankesterden qorǵaıtyn ǵylymı jobany qolǵa aldy
Jas qyzdyń tabıǵatqa degen qamqor peıili ony «Qazaqstannyń 100 jańa esimi» jobasynyń jeńimpazy etip otyr. Prezıdent Qasym-Jomart Toqaev ta joba jeńimpazdarymen kezdesýinde onyń bul eńbegin erekshe baǵalady.
Orman qorǵaý taqyrybynda 60-qa jýyq ǵylymı maqalasy shyqqan Ekaterına Vıbe Á.Bókeıhan atyndaǵy Qazaq orman sharýashylyǵy jáne agroorman melıoratsııasy ǵylymı-zertteý ınstıtýtynda jumys isteıdi. Jas bolǵanyna qaramastan, talaı halyqaralyq jáne respýblıkalyq jobalarǵa atsalysqan. 2020 jyly Koreıa Respýblıkasynyń ormantaný ınstıtýtymen birge qara sekseýildiń zııankes jándikterge tózimdiligin zerttegen bolatyn.
«Biz Shyǵys Qazaqstannyń shyrshaly ormandaryn, Ertis óńiriniń qaraǵaıly ormandaryn, qaıyń ormandaryn zerttedik. Qazir sekseýildiń zııankes jándikterge tózimdiligin zertteýdy qolǵa aldym. Bul Qyzylorda sııaqty óńirler úshin shyn máninde ózekti másele. Aǵashty egý jetkiliksiz, ekken soń kútý kerek», - deıdi orman janashyry.
Ekaterına shóleıttenýge beıim óńirlerdi azyp-tozýdan saqtaıtyn sekseýildiń eń tózimdi túrlerin anyqtamaqshy.
«Búgin osy sharadan shyǵyp, Qyzylordaǵa baramyn. Qazir de ózim osynda turǵanymmen oıymnyń bári sol jaqta. Bul jolǵy sapar barysynda sekseýildiń zııankes jándikterge tózimdi túrlerin anyqtamaqshymyz. Bul oıymyz iske assa, shóleıttenýge beıim aýmaqtarǵa úlken kómegimiz tıetin edi», - «100 jańa esim» jeńimpazy.
