«100 jańa esim» jeńimpazy: Aýylda da armandar oryndalady

NUR-SULTAN. QazAqparat – «Óz isterim arqyly aýylda da sapaly ómir súrip, oı-armandardy oryndaýǵa bolatynyn dáleldegim keledi». «Qazaqstannyń 100 jańa esimi» jobasynyń jeńimpazy «Kolos ferma» JShS dırektory Inna Korneeva Prezıdentpen kezdesýden alǵan áserimen bólise otyryp osyndaı oı aıtty, dep habarlaıdy QazAqparat tilshisi.

Inna Korneeva mal tuqymyn asyldandyrýmen aınalysatyn sharýashylyq keshenin basqarady. Jumystan qoly qalt etkende metsenattyq jobalarymen Qostanaı oblysyndaǵy Denısov aýdany men Sverdlov aýyldyq okrýginiń damýyna úles qosyp júr.

«Kolos ferma» JShS asyl tuqymdy aberdın-angýs sıyryn ósirýmen aınalysady. 2019-2020 jyldary Estonııadan 330 iri qara satyp ákeldik. Biz ósimdik sharýashylyǵymen de aınalysamyz. Uıymnyń negizin qaıyn atam Korneev Aleksandr Anatolevıch qalaǵan bolatyn. Qazir otbasylyq sharýashylyqty damytý meniń moınyma kóshti. Bolashaqta ulym ákesi men atasynyń jolyn jalǵastyrady. Kenttegi negizgi jumys berýshi kásiporynbyz, shamamen 125 jumysshy bar. Biz jańa tehnologııalardy jasqanbaı engizýdiń arqasynda órkendep kelemiz» - dedi Inna Korneeva.

«100 jańa esim» jobasyna onyń kandıdatýrasyn jergilikti ákimdik usynǵan eken. 2019 jyly aýylǵa stadıon salyp, spartakıada ótkizgen eńbegin eskerse kerek. Endi osy týrnırdi Aleksandr Korneevti eske alatyn dástúrli shara etpekshi.

«Aýylymyzda sportty damytsam deımin. Sol úshin kishkentaı balalardy sportqa baýlıtyn bapker alǵyzdyq. Aýylda balalar az. Soǵan qaramastan, jarty jyldyń ishinde aýdandyq jarystarda top jara bastadyq. Sportty damytý arqyly jastardyń osynda turaqtap qalǵanyn kózdep otyrmyn. Bul joba aýylda turýǵa bolatynyn, aýylda damý kerektigin kórsetedi dep oılaımyn. Óıtkeni aýyl –ekonomıkanyń mańyzdy ajyramas bóligi. Aýyl joıylsa, ekonomıkaǵa qıyn bolady. Sondyqtan men óz isimmen aýylda turýǵa, damýǵa, oı-armandardy júzege asyrýǵa bolatynyn dáleldeımin», - dedi «100 jańa esim» jeńimpazy.