100 jańa esim: Kandıdattardy ÚEU-lar usynatyn bolady

ASTANA. QazAqparat - Elimizdiń «100 jańa esimin» irikteý jónindegi jumys komıssııasy jobanyń ekinshi kezeńi bastalǵanyn jáne jańa baıqaýdyń buǵan deıingisinen erekshelikterin aıtyp berdi, dep habarlaıdy QazAqparat tilshisi.

«Bul kezeńde ótinimderdi jınaý ǵana aıaqtalyp, al irikteý kelesi satyda júrgiziletin bolady. Mine sol ýaqytta biz tizimdi qalyptastyra bastaımyz. Negizgi  ereksheligi mynada, eger ótken jyly adamdar ótinimderdi ózderi bere alsa, bul jyly ótinimder úkimettik emes uıymdar arqyly beriletin bolady», - dedi «Qazaqstan jastarynyń kongresi» zańdy tulǵalar birlestiginiń atqarýshy dırektory Toqtar Bolysov QazAqparat tilshisimen áńgimelesýi barysynda. 

Onyń aıtýynsha, elimizde qyzmettiń san alýan túrimen aınalysatyn myńdaǵan úkimettik emes uıym bar.

«Eger ol bıznesmen bolsa, onda bıznes qoǵamdastyq arqyly, eger ol jas belsendi bolsa, onda kez kelgen jastar uıymy arqyly ótinim bere alady. Kandıdat jeńiske jetip,  «100 jańa esim» tizimine engen jaǵdaıda uıym ony odan ary ilgeriletýmen aınalysady. Bul joba jeńimpazy úshin qosymsha pıar bolmaq», - dedi ol.

Toqtar Bolysovtyń paıymynsha, jobaǵa engizilgen mundaı jańalyq barynsha laıyqty kandıdatty tańdaýǵa mol paıda ákeledi.

«Meniń oıymsha, bul barynsha sapaly irikteý júrgizý úshin qajet. Óıtkeni, elimizde bes jyldan astam ýaqyt boıy jumys istep kele jatqan qoǵamdyq uıymdar azamattardyń qaısysynyń barynsha belsendi azamattyq ustanymy bar ekenin biledi. Sonymen qatar bul úkimettik emes uıymdardy belsendi bola túsýge yntalandyryp, olardyń Qazaqstandaǵy tanymaldyǵyn arttyrady dep oılaımyn», - dedi komıssııa ókili.

Ókinishke oraı ol qazirgi ýaqytta qandaı kandıattar usynylǵanyn aıta almady. Sebebi jumys toby kandıdattardyń tizimin tolyq alǵan joq. Degenmen, olardyń arasynda elimizge tanymal azamattardyń bolmaıtyndyǵy anyq.

«Tizimdi bizge sál keıinirek beredi. Medıalyq tulǵalarǵa qatysty aıtar bolsa, onda bul jobany «100 jańa esim» dep bekerden beker atamaıdy. Soǵan saı ázirshe tanymal emes, biraq elimizdiń nemese naqty bir óńirdiń damýyna úlken úles qosqan tulǵalar bolady. Ótken jyly ózderińiz de ártister ne bolmasa halyqtyń aýyzynda júrgen ózge de tanymal esimderdiń qatyspaǵandyǵyna kóz jetkizý múmkindigine ıe bolǵan edińizder. Joba búginde tanymal bolǵan tulǵalardy nasıhattaýǵa emes jańa esimderdi tanytýǵa baǵyttalǵan», - dedi Toqtar Bolysov.

Onyń aıtýynsha, ótken jyly negizgi tizimge engen adamdar da óz kandıdatýralaryn usyna alady.

«Naqty ólshemsharttary qazirgi ýaqytta bekitý satysynda tur. Degenmen, negizgisi - bul kandıdattyń Qazaqstannyń damýyna qosqan úlesi. Qosymsha ólshemsharttar sál keıirek jumys keńesinde jarııalanatyn bolady», - dedi ol.

Sonymen qatar «Qazaqstan jastarynyń kongresi» ZTB-nyń atqarýshy dırektory jobanyń jańa kezeńinen ne kútetindigin aıtyp berdi.

«Jastar uıymynyń jetekshisi bolǵannan keıin ótken jyly tizimge engen jastar jaıynda ǵana pikir bildire alamyn. Olar búkil elimizdiń jastary aldynda sóz sóıleý múmkindigine ıe boldy. Sol arqyly olardy ózderin odan ary damytýǵa yntalandyrdy desek atyq aıtqandyq emes. Jastardyń qulshynystary oıana bastaǵanyna kýá boldym. Bul jastar úshin úlken yntalandyrýshy kúsh sanalady. Buǵan qosa, joba úlken baılanystarsyz nemese aqshasyz da zor tabysqa qol jetkizýge bolatyndyǵyn dáleldeıdi»,-  dedi Toqtar Bolysov.

Esterińizge sala ketsek, «Qazaqstannyń 100 jańa esimi» jobasynyń ekinshi kezeńine ótinimder qabyldaý 7 tamyz kúni bastalǵan bolatyn.