100 tonna qural-jabdyq, sfera jáne otshashý: Almatyda Kane Ýestiń kontsertine qalaı daıyndalyp jatyr
ALMATY. KAZINFORM – 14 tamyzda Almatynyń Ortalyq stadıonynda tanymal amerıkalyq ártis Kane Ýestiń kontserti ótedi. Uıymdastyrýshylar bul aýqymdy shoýǵa daıyndyq qalaı júrip jatqanyn aıtty.
«Qaırat» fýtbol klýbymen kelissóz
First Media Group kontsertik jobalardy damytý jónindegi dırektory Aıtýar Álibekov bastapqyda Ortalyq stadıonnyń kestesin eskere otyryp, kontsertti basqa kúni ótkizý josparlanǵanyn aıtty. Alaıda ártistiń jospary ózgerýine baılanysty Almatydaǵy shoýdyń kúnin aýystyrý qajet bolǵan.
Aıtýar Álibekovtiń aıtýynsha, kontsert kúnin ózgertý múmkindigi kelisimshartta aldyn ala qarastyrylǵan. Osydan keıin uıymdastyrýshylar «Qaırat» FK jánk Ortalyq stadıon basshylyǵymen, Almaty ákimdigimen jáne is-sharany daıyndaýǵa qatysatyn basqa da qurylymdarmen kelissózder júrgizgen.
– Aqparattyq keńistikte «Qaıratpen» bolǵan kelispeýshilik týraly kóp aıtyldy. Eshqandaı da qaqtyǵys bolǵan joq, eshkim eshkimdi stadıonnan qýǵan joq. Qazirgi tańda barlyq másele retteldi. Kontsert 14 tamyz kúni Almatynyń Ortalyq stadıonynda ótedi, - dep málimdedi Aıtýar Álibekov.
First Media Group atqarýshy dırektory Alfııa Nurǵumarova «Qaırat» klýbynyń ókilderimen baılanysta ekenin habarlady. Uıymdastyrýshylar stadıondaǵy shóptiń jaǵdaıy úshin jaýapkershilikti óz moınyna alǵan. Bul - Sporttyq ǵımarattar dırektsııasymen jasalǵan kelisimshartta qarastyrylǵan.
– Qanshalyqty qarjylaı shyǵyndar talap etilýi múmkin ekenin túsinemiz. Barlyq montaj jumystary shóptiń jaǵdaıyn baqylaıtyn agronomnyń qadaǵalaýymen ótedi. Biz buǵan daıynbyz jáne bárin talqylap qoıdyq, - dedi ol.
Sahna kez kelgen orynnan kórinedi
Áleýmettik jelilerde eń kóp talqylanǵan taqyryptardyń biri — sahnanyń kórinýi boldy. Jeli qoldanýshylary araqashyqtyqty ózdiginen eseptep, belgili bir sektordaǵy kórermender ártisti kóre almaı qalýy múmkin degen syzbalardy jarııalaı bastaǵan.
Alaıda uıymdastyrýshylar sahna 360 gradýstyq formatta jumys isteıtinin jáne trıbýnalardan da, bı alańynan da jaqsy kórinetindeı araqashyqtyqta ornalasatynyn atap ótti. Qazir Almatydaǵy shoýdy ótkizý úshin 100 tonnadan astam tehnıkalyq qural-jabdyq jetkizilip jatyr.
– Kópshiligi Almatydaǵy kontsert basqa qalalarda sekildi aýqymdy bolmaıdy-aý dep jazdy. Múlde olaı emes. Almatyda beıimdelgen nusqasy emes, ǵalamtordan kórip júrgendeı aýqymdy shoý kórsetiledi. Sahna da, sfera da, otshashýlar da bolady, - dep Aıtýar Álibekov.
Kelissózder jarty jyl buryn bastaldy
Kontsert ótetini jaqynda belgili bolǵanymen, ártistiń komandasymen kelissózder jarty jyl buryn bastalǵan. Uıymdastyrýshylardyń aıtýynsha, Kane Ýestiń josparlanǵan álemdik týry bar. Ol Almatydan keıin negizinen AQSh-ta jalǵasady. Qazaqstan tarapy halyqaralyq agenttermen jáne ártisterdiń menedjerlerimen baılanystyń arqasynda gastroldik keste týraly aqparatty aldyn ala alǵan.
Kelissózder uzaqqa sozylyp, kúrdeli ótken. Uıymdastyrýshylarǵa tehnıkalyq talaptardy, logıstıkany, qaýipsizdikti, turmystyq raıderdi jáne basqa da máselelerdi kelisý qajet boldy.
— Olarda ár baǵytqa ártúrli mamandar jaýap beredi. Árqaısysy óz jaýabyn berip, barlyǵy kelisilgenshe kóp ýaqyt ótedi. Sodan kelissózder uzaq ári kúrdeli boldy. Jalpy biz kelissózderdi shamamen jarty jyl buryn bastadyq. Al daıyndyq merzimi munshalyqty qysqa bolady dep ózimiz de kútpedik. Biz tipti qazan, qarasha aılaryn da qarastyrdyq. Degenmen týrdyń osy bóliginen keıin ártistiń búkil komandasy Amerıkaǵa ushyp ketedi. Eger kontsertti, mysaly, qazan aıynda ótkizsek, barlyq qural-jabdyqty bólek jetkizip, búkil komandamen qaıtadan kelisýge týra keler edi. Al qazir barlyq qural-jabdyq ózderimen júr jáne komandamen birge Almatyǵa keledi, — dedi Alfııa Nurǵumarova.
Bıletterdiń quny men sheteldik kórermen
Alfııa Nurǵumarova bılet baǵasy ártistiń komandasymen kelisiletinin, al olardyń quny kontsertti ótkizýge ketetin jalpy shyǵyndardy eskere otyryp qoıylatynyn atap ótti. Onyń aıtýynsha, bıletter resmı satylymda áli de bar, biraq otyratyn oryndar qalmaǵan.
Sonymen qatar medıakompanııa ókilderi kórermenderdiń qaıdan elderden kelgeni týraly kontsertten keıin soń belgili bolatynyn aıtty. Osyǵan deıingi halyqaralyq is-sharalardy ótkizý tájirıbesi kórsetkendeı, sheteldikter ádette aýdıtorııanyń keminde 20%-yn quraıdy. Kontsert úshin Almatyǵa Qytaıdan, Ortalyq Azııa elderinen jáne basqa da memleketterden meımandar keledi dep josparlanǵan.
Odan bólek kontsert ótetin kúni metropolıten jumysyn uzartý josparlanǵan. Al kórermenderdi tasymaldaý úshin arnaıy shatl-avtobýstar iske qosylmaq.
Eske salaıyq, buǵan deıin Astana men Bishkekte qanshalyqty Kane Ýest kontserti ótýi múmkin ekenin jazǵanbyz.
