100 teńge úshin tóbeles: Áleýmettik jelide bazardaǵy janjaldyń vıdeosy tarady

ALMATY. QazAqparat - Almaty mańynda ornalasqan «Altyn Orda» bazarynda turaqqa aqsha jınaıtyn jigit pen júrgizýshi tóbelesti. Janjaldyń vıdeosy áleýmettik jelide tarady, dep habarlaıdy QazAqparat tilshisi.

«Vıdeo avtorynyń aıtýynsha, 30 naýryz kúni tańǵy saǵat 9:10-da «Altyn Orda» bazaryna kelgen kezde olardan kólik turaqshysyna uqsaıtyn adam turaq úshin 100 teńge suraǵan. Biraq júrgizýshi qolma-qol aqsha bolmaǵandyqtan Kaspi qosymshasyna aýdarǵysy keletinin aıtqan. Turaqshy bas tartyp, kóliktiń ıesin qýyp shyǵýǵa tyrysqan kórinedi. Saldarynan tóbeles bastalǵan» deıdi vıdeojazbadaǵy adam.

Almaty oblystyq polıtsııa departamentiniń baspasóz qyzmeti málim etkendeı, oqıǵa búgin tańerteń, ıaǵnı 30 naýryzda «Altyn Orda» bazarynda saǵat 09:10 shamasynda bolǵan.

«Atalǵan derek áleýmettik jelilerge monıtorıng júrgizý barysynda anyqtaldy. Oqıǵa ornyna Qarasaı aýdandyq PB jedel tergeý toby shyqty. Derek sotqa deıingi tergeýdiń biryńǵaı tizilimine tirkelip, QR QK 293-baby 2-bóliginiń 1-tarmaǵy boıynsha qylmystyq is qozǵaldy. Qazirgi ýaqytta beınejazbanyń barlyq qatysýshylary anyqtaldy. Qylmystyq is boıynsha tergeý barysynda eki taraptan da jaýap alynady»,- dep habarlady polıtsııadan.

Sotqa deıingi tergep-tekserý barysynda oqıǵanyń barlyq faktileri, sebepteri men mán-jaıy anyqtalady.

Tergeý nátıjesi boıynsha protsessýaldyq sheshim qabyldanady.