100 suraqqa - 100 jaýap basylyp shyqty
ASTANA. 29 qarasha. QazAqparat - Qazaqstan musylmandary dinı basqarmasy qolaıly qoıyn kitapshasyn shyǵardy. Jan azyǵy - shaǵyn kitapshada qarapaıym musylmandy mazalaıtyn suraqtar jaýabymen qosa berilgen.
«Qundy dúnıeniń ereksheligi - ımandylyqqa bet buryp, adamǵa ul, Qudaıǵa qul bolýdy ómirdiń ózegi dep biletin ár adamnyń Islam qundylyqtaryna qatysty bilýi tıis suraqtar men jaýaptar túsinikti tilmen jazylǵan. Sondaı-aq dastarhan batasyn bilsem eken degen nıetpen júrgender de izdegenin osy kitapshadan tabady. Taǵy bir tilge tıek eterligi, qundy dúnıeni rýhanı keshterde, araqsyz adal toılarda, ǵıbratty kezdesýlerde jıynnyń kórkin qyzdyrý maqsatymen vıktorınalyq suraqtar oıyny retinde paıdalanýǵa bolady»,-delingen QMDB málimetinde. Ol - oınaý hám oılaný quraly. Jaryqqa shyqqan kitapshanyń jamaǵatqa jol tartýyna muryndyq bolǵan - QMDB-nyń dinı ýaǵyz-nasıhat bólimi. Jaýapty redaktory - osy bólimniń bas mamany Altynbek Utyshanuly.
