Stýdentter senbilikke belsene qatysty: elordada ekologııalyq aktsııa ótti
ASTANA. KAZINFORM — Astanada «Taza Qazaqstan – jaýapkershilik belesi» ekologııalyq aılyǵy men «Taza qala» ekologııalyq aktsııasy aıasynda Esil ýnıversıtetiniń 100 stýdentiniń qatysýymen senbilik ótti.
Elordada bastalǵan aýqymdy ekologııalyq aılyq qala turǵyndaryn tazalyq pen qorshaǵan ortaǵa janashyrlyqpen qaraý ıdeıasy aıasynda biriktirip otyr. 11 sáýirden bastap qala boıynsha aýmaqtardy tazalaý jáne abattandyrý jumysy júrgizilip jatyr.
Osyndaı ıgi bastamalardyń biri Sh.Qudaıberdiuly dańǵyly men A.Pýshkın kóshesiniń qıylysyndaǵy gúlzarda ótti.
Tańerteńnen jınalǵan Esil ýnıversıtetiniń stýdentteri ortaq iske úles qosyp, arnaıy qural-jabdyqtarmen aýmaqty qoqystan tazalap, joldar men jasyl jelekterdi retke keltirdi.
Baıqońyr aýdany ákimdiginiń ishki saıasat bóliminiń ókilderi bul sharanyń bir rettik aktsııa emes, júıeli jumys ekenin atap ótti. Olardyń aıtýynsha, mundaı is-sharalar turǵyndardyń tazalyqqa degen jaýapkershiligin arttyryp, qoǵamdyq ómirge belsendiligin kúsheıtedi.
— Respýblıkalyq «Taza Qazaqstan» aktsııasy aıasynda gúlzarymyzda senbilik ótkizdik. Negizgi maqsat — jastardy osy bastamanyń ıdeologııasyna baýlý. Bul tek senbilikke qatysý emes, barlyq saladaǵy tazalyq pen tártipti qamtıdy. Mamyr aıynyń sońyna deıin senbilikter jalǵasady. Barlyq turǵyndy, kásipkerlerdi, bilim berý uıymdaryn óz aýmaqtaryn retke keltirýge shaqyramyz, — dedi Baıqońyr aýdany ákimdiginiń mamany Nurıslam Batyrbek.
Qatysýshylardyń aıtýynsha, mundaı sharalar qalany taza etip qana qoımaı, qorshaǵan ortaǵa jaýapkershilik mádenıetin qalyptastyrady.
– Búgingi senbilikke jaqsy kóńil-kúımen qatystyq. Byltyrdan qalǵan aǵash japyraqtaryn jınap, aýmaqty tolyq tazarttyq. Mundaı sharalar kommýnaldyq qyzmetkerlerdiń eńbegin baǵalaýdy úıretedi. Bul — qalamyzdyń ekologııasyna qosqan úles. Qala taza bolsa, densaýlyq ta myqty bolady, — dedi Esil ýnıversıtetiniń «quqyqtaný» mamandyǵynyń stýdenti Aınur Battalǵazy.
Senbilik nátıjesinde aýmaq tazaryp qana qoımaı, qatysýshylar arasynda birlik pen ortaq iske degen jaýapkershilik sezimi qalyptasty.
Buǵan dein Astanada aýqymdy jalpyqalalyq senbilik bastalǵanyn jazǵanbyz.