«100 SARBAZ» jobasynyń ekinshi maýsymy kórermenge jol tartady
ASTANA. KAZINFORM — Jibek Joly arnasynda kórermen qyzyǵýshylyǵyna ıe bolǵan «100 SARBAZ» jobasynyń ekinshi maýsymy jaryq kórmek. Bul týraly «Búgin Live» baǵdarlamasynda belgili boldy.
— Bul joly qatysýshylar tabıǵat aıasynda, Býrabaıda synalǵan. Jobaǵa elimizdiń túrli áskerı qurylymdarynyń sarbazdary qatysty. Olardyń qatarynda desantshylar, qutqarýshylar, arnaıy jasaq ókilderi men áskerı kadetter bar. Sonymen birge tanymal sportshylar, akterler men blogerlerden quralǵan komanda da óz kúshin synady. Dala saıysynda qıyndyqtar kóp boldy. Jaraqat alǵan qatysýshy da bar, — dedi jobanyń júrgizýshisi Dáýren Serǵazın.
Jobaǵa barlyǵy 10 komanda qatysqan. Onyń toǵyzy Qarýly kúshter, Іshki ister mınıstrligi jáne Tótenshe jaǵdaılar mınıstrligi sııaqty áskerı jáne kúshtik qurylymdardyń ókilderinen jasaqtalsa, taǵy bir komanda sport, óner jáne mádenıet salasynyń ókilderinen quralǵan.
Túsirilim toby áskerılerdiń bir táýliktegi tirshiligin barynsha shynaıy kórsetýge tyrysqan.
— Tabıǵattyń tosyn syıyna qaramastan túsirilim jalǵasty. Ereksheligi — áskerılerdiń 24 saǵat jumysyn kórsetýge tyrystyq. Dalada ómir súrdik. Shynaıy, sapaly kadrlar qamtyldy, — dedi jobanyń prodıýseri Erǵulan Janpeıisov.
Jobany daıyndaý jumystary bir jarym aıǵa sozylǵan. Osy kezeńde túsirilim toby synaqtardy aldyn ala pysyqtap, qatysýshylardy iriktegen. Al negizgi túsirilim 11 kúnge jalǵasqan.
Saıys baǵdarlamasyna kúsh, eptilik pen tózimdilikti talap etetin birneshe kezeń engizilgen. Qatysýshylar ot jaǵyp, júzip, taýǵa kóterilip, aýyr júk kóterip, tas domalatyp, qalqan ustaǵan. Budan bólek, «Batyrlar júgi» dep atalatyn arnaıy kezeń uıymdastyrylǵan.
— 10 sarbazǵa 10 túrli batyrdyń júgi tapsyryldy. Ony 100 shaqyrym júgirip ótip, estafetada tapsyrý kerek. Budan bólek, sıtýatsııalyq sátter de qamtyldy. Upaıdy sarapshylar qoıdy. Fınalǵa myqty komanda ǵana jetti, — dedi Dáýren Serǵazın.
Osylaısha, jobanyń ekinshi maýsymynda qatysýshylardyń fızıkalyq daıyndyǵymen qatar, tótenshe jaǵdaıda áreket etýi, komandalyq jumysy men sheshim qabyldaý qabileti de synalǵan. Jobanyń jańa maýsymyn kórermender Jibek Joly arnasynan tamashalaı alady.
