100 ret pe? 100 adamnan ba? — Mobıldik aýdarymnyń tártibi túsindirildi

ASTANA. KAZINFORM – Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly mobıldik aýdarymdarǵa qoıylatyn shekteý máselesin túsindirdi.

— Mobıldik aýdarym – bul jeke tulǵanyń óziniń qajettiligine arnalǵan, kásipkerlik qyzmetke arnalmaǵan, salyq salýǵa jatpaıtyn aýdarym túri. 

Kásipkerler salyq tóleýden jaltarý maqsatynda mobıldik aýdarymdardy kóp paıdalanyp ketti. Osy tulǵalardy anyqtap, óz kiristerine salyq tóleýdi mindetteý úshin jáne jeke kásipker retinde tirkelmegen tulǵalardy tirketý maqsatynda mobıldik aýdarymdardy baqylaý júzege asyrylyp jatyr. Bunyń negizgi ólshemsharty — aı saıyn 100 nemese odan da kóp tulǵalardan 3 aı qatarynan mobıldik aýdarym alý. Osyndaı jaǵdaı anyqtalǵanda ǵana Memlekettik kirister komıteti kameraldyq baqylaýǵa alady. Bul jerde atap ótetin jaıt, aýdarym 100 ret emes, 100 tulǵadan, ıaǵnı 100 túrli adamnan kúntizbelik 3 aı qatarynan túsken jaǵdaıda ǵana ereje buzylǵan bolyp sanalady, - dedi ol. 

Sondaı-aq bas sarapshy Qarjy mınıstrligi qoldanystaǵy erejeni tolyqtyrý úshin Ulttyq bankke jańa usynys bergenin atap ótti.

— Osy 100 aýdarym ólshemshartyn saqtaı otyryp, osy aýdarymdar kezinde túsken qarjynyń jalpy somasy 255 myń teńgeden assa ǵana erejeni buzdy dep qaraıtyn usynys engizildi. Bunyń negizgi maqsaty — óte tómen somalardy (máselen 100 teńgeden jasalǵan aýdarymdar) baqylaýdan alý. Sebebi bizde Kásipkerlik týraly Kodekske saı, eń tómengi aılyqtyń (85 myń teńge) 12 eselengen mólsherinen asatyn tabys tapqan jeke tulǵany ǵana salyq organy dara kásipker retinde tanyp, esepke qoıa alady. ıAǵnı ár aıda 85 myńnan, 3 aıda 255 myńnan tómen tabys tapqan adam dara kásip ıesi bolyp sanalmaıdy, - deıdi Ersaıyn Kóptileýuly. 

Maman qazirgi tańda bul norma kúshinde emes ekenin, áli Ulttyq bankpen kelisý satysynda ekenin qaıyra eske saldy. 

Aıta keteıik, keshe jeke kásip ıesi mobıldik aýdarymǵa qatysty qandaı erejeni eskerý keregin jazǵan edik.