100 paıyz otandyq kólik shyǵarýǵa qansha ýaqyt qajet
NUR-SULTAN. QazAqparat – 100 paıyz otandyq kólik shyǵarý úshin 10-15 jyl ýaqyt kerek. Bul týraly búgin QR Parlamenti Májilisiniń depýtaty, «Qazaqstannyń mashına jasaýshylar odaǵy» ZTB basqarmasynyń tóraǵasy Meıram Pishembaev aıtty, dep habarlaıdy QazAqparat tilshisi.
«Biz ózimizdiń avtomobıldi bastan-aıaq jasap shyǵarýymyz úshin 10-15 jyl qajet dep esepteımiz. Sondyqtan tehnologııalar transfertin júzege asyryp, olardy satyp alý arqyly qalǵanyn ózimizde shyǵarý tabysqa jetýdiń eń qysqa joly. Buǵan qosa, qazaqstandyq kólikterdiń qoljetimdi bolýy úshin ekinshi deńgeıli bankter arqyly memleket qarajaty bólinip jatyr. Biraq, oǵan úlken kezek qalyptasqan. Ótken, onyń aldyndaǵy jyldary bólingen qarajattar jyldyq 4 paıyzpen avtonesıege berildi. Ótken jyldy 2017 jylmen salystyrǵanda avtomobıl óndirisi 3 esege jýyq artty», - dedi ol Úkimet úıinde ótken baspasóz máslıhatynda.
Onyń aıtýynsha, 100 paıyz otandyq kólik shyǵarýǵa uzaq jyldar ýaqyt jumsaǵan elder bar. Máselen, Ońtústik Koreıa oǵan 60 jyl ketirdi. Al bizde 2010 jylǵa deıin avtomobıl, elektrovoz, teplovoz óndirisi bolǵan emes. Sonymen qatar, ol kólikke qajetti bólshekterdiń 50 paıyzyn shyǵaratyn óndiris oshaqtary el ishinde bolǵanda da Qazaqstannyń avtomobılderi syrtqy naryqta ótimdi bolatyndyǵyn aıtty. Bul baǵytta da naqty jumys bar. Qazirgi ýaqytta elimizde kóliktiń akkýmýlıatory, dıskisi shyǵarylyp, kólik shanaǵyn dánekerleý, syrlaý, jáne qurastyrý jumystary júrgiziledi.
