100 oqýlyqtyń keıingi urpaqqa bereri mol - Sholpan Qydyrnııazova

ORAL. QazAqparat - Qundy oqýlyqtyń keıingi urpaqqa bereri mol. Bul týraly til janashyry, aıtysker aqyn, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Sholpan Qydyrnııazova málim etti, dep habarlaıdy QazAqparat tilshisi.

Onyń aıtýynsha, shabandoz ýaqyttyń shabysy men zaman talabyna saı bolýdyń joldaryn kórsetken Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda «Jańa gýmanıtarlyq bilim. Qazaq tilindegi 100 jańa oqýlyq» jobasynyń júzege asyrylýy qazirgi jas urpaq pen eldiń erteńgi keleshegi úshin tyndyrylyp jatqan úlken ıgilikti is boldy.

«Kózin kitappen ashqan urpaqtyń ókilimiz. Maqalany bastapqyda oqyp, tanysqanda, «100 jańa kitap» qandaı kitaptar, qalaı aýdarylady? degen oıdyń jylt etkeni ras. Aıtys óz aldyna, men ózim mádenıet pen til salasynda uzaq jyl qyzmet etken adammyn. Sondyqtan aýdarmanyń qanshalyqty qıyn sala ekendigin jaqsy bilemin. Kezinde «Abaı jolynyń» túpnusqasyn da, aýdarmasyn da oqydym. Aýdarmanyń aty aýdarma. Ár jańa istiń bastaýynda senim men kúdik qatar turatyny anyq. Degenmen egemen eldiń er júrekti ul-qyzdarynyń tynymsyz eren eńbegi arqasynda aýdarylatyn pánder tizimi jasaqtalyp, alǵashqy 18 kitap jaryq kórip te úlgerdi. Endi jastar fılosofııa, áleýmettaný, psıhologııa, ekonomıka men menedjment, dintaný, lıngvıstıka jáne mádenıettaný salasy boıynsha jańa oqýlyqtardy qoldanatyn bolady. Jaqsy is jalǵasyn taýyp, sapaly da qundy oqýlyqtar urpaǵymyzdy uly isterge bastaı bersin», dedi «QazAqparat» tilshisine Sholpan Qydyrnııazova.