100 oqýlyqtyń elektrondy mátinderi jańa alfavıtte jarııalanýy qajet – Memlekettik hatshy
«Birinshiden, «Rýhanı jańǵyrý» baǵdarlamasy aıasynda, memlekettik qoldaýmen shyqqan barlyq shyǵarmashylyq týyndylardyń qoǵamdyq ıgilik retinde erkin taraýy qamtamasyz etilsin. Memlekettik organdar men jekelegen uıymdar oǵan ıelik etpeýi tıis. Ekinshiden, «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha aýdarylyp shyqqan oqýlyqtar men ǵylymı ádebıettiń oqý baǵdarlamalaryna engizilip, tıimdi qoldanylýy qamtamasyz etilsin. Úshinshiden, Qazaqstan Respýblıkasynyń «Bilim týraly» zańyna qashyqtan oqytýdy jáne qashyqtan bilim beretin oqý oryndaryn zańdastyratyn jáne onlaın oqytý qyzmetin retteıtin tolyqtyrý engizý qajet», - dedi Memlekettik hatshy.
Onyń atap ótýinshe, tórtinshiden, «Ulttyq aýdarma bıýrosy» negizinde jınaqtalǵan tájirıbe men mamandardyń potentsıalyn joǵaltpaý óte mańyzdy. Qazirgi suranys pen qajettilikti eskere otyryp, balalar jáne jasóspirimder ádebıeti, gýmanıtarlyq jáne tehnıkalyq oqýlyqtar men ádebıet, iskerlik ádebıet jáne basqa da ózekti aýdarma baǵyttaryn qamtıtyn turaqty jumys jospary jasalyp, iske asyrylý qajet.
Besinshiden, «Ulttyq aýdarma bıýrosy» jáne Oksford ýnıversıtetiniń baspasy daıyndaǵan «Qazaq-aǵylshyn», «aǵylshyn-qazaq» Oksford sózdigi basylyp, barlyq orta jáne joǵary oqý oryndarynyń kitaphanalaryna jetkizilsin. Altynshydan, latyn grafıkasyna kezeń-kezeńmen ótý jospary aıasynda aýdarylǵan 100 oqýlyqtyń elektrondy mátinderi Qazaqstandyq ashyq ýnıversıtet negizinde jańa alfavıtte jarııalanýy qajet dep esepteımiz. Sonymen birge, mektep baǵdarlamasyna kirgen qazaq ádebıetiniń klassıkalyq týyndylary Kitap.kz – Qazaqstannyń ashyq kitaphanasy negizinde latyn grafıkasyna kóshirilsin», - dedi Qyrymbek Kósherbaev.