«100 oqýlyqqa» qatysty túsken 800 usynystyń ishinen 17 kitapty aýdaryp jatyrmyz - Raýan Kenjehanuly
ALMATY. QazAqparat - Ulttyq aýdarma bıýrosy 100 jańa oqýlyqty aýdarý jobasy aıasynda bıyl 17 kitapty qazaq tilinde sóıletpek. Bul jumystarǵa 90-nan asa ǵalymdar men aýdarmashy-redaktorlarlar jumyldyrylǵan, dep habarlaıdy QazAqparat tilshisi.
Aıta keteıik, Qazaqstan Prezıdenti Nursultan Nazarbaevtiń «Rýhanı jańǵyrý» baǵdarlamasy aıasyndaǵy «Jańa gýmanıtarlyq bilim. Qazaq tilindegi 100 jańa oqýlyq» jobasyn júzege asyrý úshin Ulttyq aýdarma bıýrosy qurylǵan bolatyn. Eki aı buryn qurylǵan bıýro búginde 17 kitapty iriktep alyp, aýdarýǵa kirisip ketken. Búgin Almatydaǵy «Dostyq» qonaq úıinde osy jobaǵa baılanysty atqarylyp jatqan aýdarma jumysyn talqylaýǵa arnalǵan «Qazirgi ǵylymı aýdarma teorııasy men praktıkasy» taqyrybynda dóńgelek ústel ótti.
Jıynǵa joǵary oqý oryndarynyń oqytýshy-ǵalymdary, aýdarmashylar, redaktorlar, baspagerler men tilshi, ádebıetshi mamandar keldi. Ulttyq aýdarma bıýrosynyń atqarýshy dırektory Raýan Kenjehanuly qazirgi ýaqytta fılosofııa, áleýmettaný, psıhologııa, mádenıettaný, dintaný, til bilimi, ekonomıka, menedjment pen kásipkerlik salalary boıynsha álemniń úzdik oqý oryndarynyń qoldanysyndaǵy eń tanymal oqýlyqtar qazaq tiline aýdarylyp jatqanyn aıtty.
«100 jańa oqýlyq» baǵdarlamasyn júzege asyrý úshin kommertsııalyq emes uıym quryldy. Osy uıymnyń úılestirýimen aýdarma jumystary júrip jatyr. Bıyl 17 oqýlyqty aýdarý bekitildi. Oqýlyqtardy irikteý úshin barlyq joǵarǵy oqý oryndarynan 800-ge tarta usynys tústi. Sonyń ishinen aqyldasa otyryp, osy 17 oqýlyqty iriktep aldyq. Oqýlyqtardy aýdarýǵa Qazaqstannyń aldyńǵy qatarly oqý oryndarynyń ustaz, ǵalymdarynan turatyn jumys toby quryldy. Ár oqýlyqtyń óz jumys toby bar», - dedi Raýan Kenjehanuly.
Raýan Kenjehanulynyń aıtýynsha, oqýlyqtardy ustazdar men stýdentter paıdalanatyn bolǵandyqtan sol oqý ornynda jumys isteıtin ǵalymdar aýdarýǵa at salysyp jatyr.
«Sebebi, bul oqýlyqtardy oqytýshylar kúndelikti jumysy úshin aǵylshyn tilinen, basqa tilderden lektsııaǵa aýdaryp, qoldanyp júrgen. Kelesi kezekte, osy oqytýshylar jasaǵan mátinniń alǵashqy nusqasyna syrttan shaqyrylǵan ǵalymdar ǵylymı saraptama jasaıdy. Sosyn, redaktýra jasaý úshin til mamandary tartylady», - dedi ol.
Ulttyq aýdarma bıýrosy tárjimalap jatqan 17 kitaptardyń tizimin tómende usynyp otyrmyz:
1. Derek Johnston. A Brief History of Philosophy: From Socrates to Derrida
2. Anthony John Patrick Kenny. A New History of Western Philosophy (In Four Volumes). Volume 1
3. Anthony John Patrick Kenny. A New History of Western Philosophy (In Four Volumes). Volume 2
4. Remı Hess. 25 klıýchevyh knıg po fılosofıı
5. David Brinkerhoff, Suzanne Ortega, Rose Weitz. Essentials of Sociology. 9th Edition
6. George Ritzer. Sociological Theory. 10th Edition
7. Elliot Aronson. The Social Animal. 11th Edition
8. Duane P. Schultz, Sydney Ellen Schultz. A History of Modern Psychology. 11th Edition
9. David Myers. Social Psychology
10. Gregory Mankiw. Economics. 4th Edition
11. Donald F. Kuratko. Entrepreneurship: Theory, Process, and Practice. 10th Edition
12. Ricky W. Griffin. Management. 12th Edition
13. Karen Armstrong. A History of God: The 4,000-Year Quest of Judaism, Christianity and Islam
14. Victoria Fromkin, Robert Rodman, Nina Hyams. An Introduction to Language, International Edition
15. Svetlana Ter-Mınasova. ıAzyk ı mejkýltýrnaıa kommýnıkatsııa
16. Alan Barnard. History and Theory in Anthropology Theory
17. Klaus Schwab. The Fourth Industrial Revolution
Kitaptardyń tizimi kitap.kz saıtynan alyndy.
