«100 naqty qadam» Ult jospary aıasynda 2016 jyldan bastap jeke sot oryndaýshylar ınstıtýty keńeıedi - Q. Mýsın

ASTANA. QazAqparat - «100 naqty qadam» Ult josparyndaǵy tapsyrmalardy júzege asyrý aıasynda 2016 jyldan bastap jeke sot oryndaýshylar ınstıtýty keńeıedi. Bul týraly búgin brıfıngte Astana qalalyq Ádilet departamentiniń basshysy Qanat Mýsın málim etti.

«Elbasy Nursultan Nazarbaev «100 naqty qadam» Ult jospary atty baǵdarlamalyq qujatynda zań ústemdigin qamtamasyz etý bóliginde sot oryndaýshylary memlekettik qyzmetshilerin satylap qysqartý týraly mindetti júktedi. Osyǵan baılanysty 2016 jyldan bastap bul salada jańa úlgi jeke sot oryndaýshylar ınstıtýtyn keń aýqymda damytý qarastyrylady. Bul ınstıtýt jurtshylyqtyń ádilsotqa qoljetimdiligin arttyryp, sot oryndaýshylar qyzmetin jańa deńgeıge shyǵarmaq», - dep atap ótti Qanat Mýsın.

Onyń sózine qaraǵanda, 2015 jyly ádilet departamenti qyzmetiniń mańyzdy baǵyttarynyń biri sot aktileriniń oryndalýyna basymdyq berý bolyp tabylady. Bul departament úshin jańa fýnktsııa bolyp ári ádilet qyzmetkerleriniń qoǵam aldyndaǵy jaýapkershiligin arttyra túsedi.

«Kadrmen qamtamasyz etý salasynda úlken problemalardyń bolǵanyna qaramastan, biz atqarý óndirisiniń tıimdiligin arttyrýǵa basa mán berip kelemiz. Máselen, 2015 jyldyń birinshi jartyjyldyǵynda elordanyń sot oryndaýshylarynyń aýmaqtyq bólimshelerinde jalpy somasy 112 mlrd. teńgeni quraıtyn 96 000 atqarýshy óndirisi boldy.

Sonymen qatar, jyl basyndaǵy sot oryndaýshylarynyń shtattyq jınaqylandyrylýy 55 paıyzdy quraǵanynan qaramastan, olardyń árqaısysyna júkteme 1500 atqarýshylyq materıaldarynan tıedi. Osylaısha, 2015 jyldyń alty aıynda 20 mlrd. teńge shamasynda 32 639 óndiris atqarylyp, onyń 78,5 paıyzy naqty júzege asty. Atqarýshylyq sanktsııasy arqasynda memlekettik kiriske 49 mln. teńgedlen astam soma óndirildi», - dedi Q. Mýsın.