«100 naqty qadam»: Kameraldyq baqylaýmen 60 myń memlekettik satyp alý qamtylyp, 116 mlrd. teńgeniń zań buzýshylyǵy anyqtaldy

ASTANA. QazAqparat - «100 naqty qadam» Ult josparynyń 93-qadamynda «Memlekettik aýdıt jáne qarjylyq baqylaý týraly» zań qabyldaý mindeti júktelgen bolatyn. Kúshine engen sol zańǵa sáıkes, elimizde Kameraldyq baqylaý ınstıtýty engizildi. Osyǵan oraı, aǵymdy jyldyń úsh aıynda kameraldyq baqylaýmen 60 myń memlekettik satyp alý qamtyldy. Bul týraly QR Qarjy mınıstrliginiń baspasóz qyzmetinen habarlandy.

«Kameraldyq baqylaý-ishki memlekettik aýdıt jónindegi ýákiletti organnyń memlekettik aýdıt obektilerine barmastan, bıýdjettik jáne basqa da zańnamany buzýshylyqtardyń ýaqtyly jolyn kesý jáne olarǵa jol bermeýge baǵyttalǵan aqparat kózderin qoldaý arqyly júrgiziletin qyzmet. Osyǵan baılanysty aǵymdy jyldyń úsh aıynda kameraldyq baqylaýmen 60 myń memlekettik satyp alý qamtyldy. Onyń ishinde 17 myń satyp alý boıynsha jalpy somasy 116 mlrd. teńgege buzýshylyqtar anyqtaldy. Demek árbir 4-inshi satyp alý buzýshylyqtarmen júrgizilgen», - delingen baspasóz baıanynda.

Mınıstrliktiń málimetine qaraǵanda, jaýapty tulǵalarǵa buzýshylyqtardy derbes joıý úshin habarlamalar baǵyttalǵan. Aıta keterligi, qatelikterdi ýaqtyly joıǵan kezde laýazymdy tulǵalar ákimshilik jaýapkershilikten bosatylady. Osyǵan baılanysty 2016 jyldyń 1 toqsanynda ákimshilik jaýapkershilikten 4 637 laýazymdy tulǵa bosatylǵan.

«Jańa ınstıtýttyń ekonomıkalyq tıimdiligi zor. Kameraldyq baqylaý obektilerge barmastan júrgiziletindikten, memlekettik aýdıt obektilerine ákimshilik júkteme tómendedi. Budan basqa kameraldyq baqylaýdy júzege asyrǵan kezde ýákiletti organ issaparlyq shyǵystardy kótermeıdi», - delingen baspasóz baıanynda.

Aıta keterligi, 2015 jyly atqarylǵan jumystar barysynda 2,7 mlrd. teńgege buzýshylyq anyqtalǵan. 481 qyzmetker jaýapkershilikke tartylyp, 249,1 mln. teńgege kelisimsharttyq mindettemeler buzyldy.