«100 naqty qadam» bolashaq úshin jasalǵan jospar

ASTANA. QazAqparat - Memleket basshysy Nursultan Nazarbaev elimizdi damytatyn bes ınstıtýttyq reformany júzege asyrýdyń 100 naqty qadamyn belgilep berdi. Bul - ult bolashaǵy úshin jasalǵan naqty jospar, halyqtyń ál-aýqatyn barynsha jaqsartý, turmys dárejesin joǵary deńgeıge kóterýden týǵan jáne de jan-jaqty qorytyndylanǵan tujyrymdar.

Buǵan deıingi jetken jetistikterimizge súıene otyryp, alǵa qaraı qozǵalý memlekettilikti damytýdyń bir sharty bolmaq. Sondyqtan, el damýynyń 100 naqty qadamy árbir saladaǵy eńbek ujymdarynan alda atqarylar qyrýar sharalarǵa barynsha yqtııattylyqpen jáne jaýapapkershilikpen qaraýdy talap etedi.

Elbasy naqty qadamdardy jáı ǵana usynyp qoıǵan joq, táýelsiz elimizdiń budan bylaıǵy damýyna basqasha kózqaraspen qaraýdyń, ony jańa deńgeıge kóterý úshin tabandylyq tanytýdyń asa qajet ekendigin alǵa tartty. Osy baǵytta usynylǵan basty baǵyttardyń atqarylý joldaryn kórsetip, maqsatyn da dál aıqyndap berdi.

Bes ınstıtýttyq reformadan týyndaıtyn 100 naqty qadam - bul strategııalyq úlken jospar. 100 naqty qadamnyń «Indýstrııalandyrý jáne ekonomıkalyq ósim» atty taraýy el damýynyń basty tetigi - ekonomıkaǵa baılanysty eń ózekti máseleler tizbegin quraıdy. Mundaǵy 35-ten 84-ke deıingi qadamdar elimizde ekonomıkalyq reformalardyń keshenin júzege asyrýdyń jaǵdaıyn jasaıtyn negizderdi qamtıdy. Atap aıtqanda, sol 35-inshi qadamda: «Aýylsharýashylyǵy jerlerin tıimdi paıdalaný maqsatymen olardy naryqtyq aınalymǵa engizý. Jer kodeksine jáne basqa da Zań aktilerine ózgerister engizý» máselesi kóterilgen. Jerimiz baı, ushy-qıyry joq keń degenimizben de, jerdiń de suraýy bar ekendigin umytpaýǵa tıistimiz.
Onyń ishinde halyqtyń dastarhanyna kól-kósir ónim ákeletin aýylsharýashylyǵy jerlerin tıimdi paıdalaný, olardy naryqtyq aınalymǵa engizý - búgingi kúnniń basty máselesi ekendigi daýsyz. Bul máselede áli de sheshilmegen túıinderdiń bar ekendigi ras. Solardy boldyrmas úshin Jer kodeksine jáne basqa da Zań aktilerine ózgeristerdiń engizilýi kózdelgen jáne bul halyq tarapynan qoldaý tabýy tıis.

Osy taraýdyń 39-ynshy qadamynda: «Keden jáne salyq júıelerin ıntegratsııalaý. Taýar salyq salý maqsatynda Qazaqstan aýmaǵyna kirgen kezeńnen bastap ony satqanǵa deıin baqylaýǵa alynady» delingen. Bul da ekonomıkalyq ósimge ıgi áser etetin shara. Kedendik resimdeýlerdiń ońtaılandyrylýy, álemdik tájirıbege kereǵar tarıf saıasatyn jeńildetý sharalary osy salada aýqymdy jumys júrgizýdi bildiredi jáne olar bastalyp ta ketti. Aıtalyq, keden resimderinen ótý kezinde «bir tereze» qaǵıdatyn, elektrondy júıe engizý, qajetti qujattar sanyn azaıtý eksport pen ımportpen aınalysýshylarǵa úlken jeńildik bolmaq. Sondaı-aq, keden jáne salyq júıeleriniń jumysyna bul qadamnyń da oń ózgeris ákeleri sózsiz.
Sondaı-aq, qurylys, elektr energetıkasy, jol-kólik ınfraqurylymy, óndiristik ınnovatsııalar engizý, osy salalarda jańa normatıvterdi engizý,
olardy qarjylandyrý, bilim berý, densaýlyq saqtaý jáne áleýmettik damý, eńbek qatynastaryn yryqtandyrý, jańa Eńbek kodeksin ázirleýge qatysty qadamdardyń da kóterip turǵan júkteri salmaqty. Basty mindet - ekonomıkalyq damý serpinin qamtamasyz etýden týyndaıtyn bul is-sharalardy iske asyrý ekonomıkany ártaraptandyrý esebinen júrgiziledi jáne munyń bári eldiń ál-aýqatyn kóterý jolyndaǵy sheshýshi baǵyttardy quraıdy. Bir sózben aıtqanda, álemniń eń damyǵan otyz eliniń qataryna qosylý úshin elimizde jańa ındýstrııalandyrý men ekonomıkalyq ósimniń qarqyny joǵary deńgeıde bolýy shart. «100 naqty qadam» bizdi osyǵan bastaıdy jáne de ol barshanyń kókiregine úmit otyn uıalatatyn mańyzdy qujat.