100 naqty qadam aıasynda tamyzdyń sońynda Parlament qaraýyna 52 zań jobasy engiziledi - Z.Baımoldına

ASTANA. QazAqparat - Ult jospary - 100 naqty qadamdy júzege asyrý maqsatynda osy jylǵy tamyz aıynyń sońynda Qazaqstan Respýblıkasy Parlamentiniń qaraýyna 52 zań jobasy engiziledi. Bul týraly QR Ádilet mınıstriniń orynbasary Záýresh Baımoldına málim etti.

"Ádilet mınıstrligi elimizdegi zań jobalaý jumystarynyń úılestirýshisi bolǵandyqtan, biz "100 naqty qadam" baǵdarlamasyn júzege asyrýǵa qajetti zańnamalardyń qabyldanýy salasynda jelilik keste qurdyq. Qazirgi tańda qolymyzda tamyz aıynyń sońynda Parlament qaraýyna engiziletin 52 zań jobasy bar. "Naqty 100 qadamdy" júzege asyrýǵa qatysty taǵy 11 zań jobasy 2016-2017 jyldary ázirlenedi", - dep habarlady Z.Baımoldına.

Vıtse-mınıstr atap ótkendeı, Ádilet mınıstrligi úshin de, barlyq memlekettik organdar úshin de jumystyń qyzǵan kezi - osy zań jobalary ázirlenip jatqan tus.

"Joǵaryda aıtqan 52 zań jobasynyń ishinde depýtattardyń bastamasy boıynsha daıyndalǵan 10 zań jobasy bar. ıAǵnı, Ult jospary - naqty 100 qadam" baǵdardarlamasyndaǵy mindetterdi oryndaý úshin atqarýshy organdar da, bıliktiń zań shyǵarýshy taraby da qarqyndy jumys istep jatyr. Bunyń barlyǵy - ózara úılestirýdi qajet etetin jumystar. Al, osy 52 zań Parlament qaraýyna engizilgennen keıin zań ázirleýshi taraptar birlesken otyrys ótkizip, zań jobalarynyń mazmuny men mindetterin salmaqtaıdy. Eń bastysy, zań jobalary sapaly bolýy kerek", - dedi óz pikirin bildirgen Z.Baımoldına.