100 myńnan astam aqmolalyq latyn qarpinde dıktant jazdy
Dıktant mátini 80-ge jýyq sózden turdy. Jazýǵa eseptelgen ýaqyt - 30 mınýt. Ereje boıynsha, jazylǵan dıktanttyń mátinin sýretke túsirip, ony Tilderdi damytý jónindegi óńirlik bólimge jiberý qajet boldy.
Aqmola oblystyq tilderi damytý basqarmasynyń basshysy Maral Jaqypovtyń aıtýynsha, jalpyhalyqtyń sharaǵa bastapqyda 80 myń adam qatysady dep josparlansa, búgin barlyǵy 102 myń 500 aqmolalyq qatysty.
«Dıktantqa memlekettik organdar, bıýdjettik uıymdar, kásiporyn, mektep oqýshylary, stýdentter men muǵalimderden bólek, jasy 15-ten asqan kez kelgen adam úıinde otyryp, ınternet arqyly qatysa aldy. Osy oraıda, uıymdastyrý jumystarynyń joǵary deńgeıde ótkenin atap ótken jón. Nátıjesinde, Aqmola oblysynyń árbir jetinshi turǵyny óńirdiń latyn álipbıindegi qazaq tiline kezeń-kezeńmen ótýge daıyndyǵy men latyn qarpin qoldanýda óziniń deńgeıine kóz jetkizdi. Dıktant jazýda Kókshetaý qalasynyń turǵyndary belsendilik tanytty», - deıdi Maral Jaqypov.
Eske salaıyq, 14 qarasha kúni saǵat 11.00-11.30 aralyǵynda bútin el boıynsha latyn qarpindegi jalpyhalyqtyq dıktant ótti. Qazaqstandyqtar dıktantty arnaıy belgilengen oryndarda jáne emle.kz, tilalemi.kz saıttarynda, «Shalqar» jáne Qazaq radıo arnalarynda tikeleı efırde mátin aýdıosyn tyńdaı otyryp jazdy. Taqyryby - «Rýhanı jańǵyrý» baǵdarlamasy. Shara aıaqtalǵan soń, mátinniń jazbasha nusqasy emle.kz, tilalemi.kz saıttarynda jarııalanyp, ár qatysýshy jańa qazaq álipbıin meńgerý deńgeıin teksere alady.
Uıymdastyrýshy - QR Mádenıet jáne sport mınıstrligi. Vedomstvo basshysy Arystanbek Muhamedıuly atap ótkendeı, latyn grafıkasyndaǵy álipbıge negizdelgen tuńǵysh jalpyhalyqtyq dıktantqa 2 mıllıonǵa jýyq turǵyn qatysty.
