100 myń dollar para: Pavlodarlyq sheneýnik eki aıǵa qamaýǵa alyndy
Pavlodar oblystyq Memlekettik kirister departamentiniń (MKD) basshysy Ernur Baıqurmanov, MKD oblystyq basqarmasy tergeý bóliminiń basshysy Azamat Beısembaev jáne jedel ýákil D.Maǵzumov 100 myń AQSh dollary kóleminde para aldy degen kúdikpen ustalǵanyn buǵan deıin habarlaǵan bolatynbyz.
3 qyrkúıek kúni óńirdiń tergeý soty departament basshysyn 31 qazanǵa deıin tergeý ızolıatorynda ustaý týraly sanktsııa berdi.
«Sotqa deıingi tergeý QR QK 366-baby 4-bóligi boıynsha (Qylmystyq top bolyp asa iri kólemdegi para alý) bastalǵan bolatyn», - dedi sotta.
Tergeý nusqasy boıynsha, atalǵan memlekettik úsh qyzmetshi «Zaman» kompanııalar tobynyń jetekshisi Tasbolat Abǵojınovtyń aryzynan keıin Ulttyq bıýro ókilderiniń nazaryna ilikken. Aıta ketsek, «Zaman» kompanııalar tobynyń quramyna Ekibastuzdaǵy kómir óndiretin kásiporyndar, bank jáne birqatar kommertsııalyq uıymdar kiredi.
Kúdikti tergeý sotynda óz kinásin moıyndamady. Onyń advokaty Rýslan Janqabaev kúdikti tergeý isine ózi aralasqysy keletinin jáne oǵan kepilge bosatý týraly bultartpaý sharasyn qoldanýdy surady. Ol úshin Ernur Baıqurmanovtyń ata-anasynyń 20 mln teńge turatyn baspanasy kepilge qoıylatynyn aıtty. Alaıda, sot ol ótinishti qabyldamady.
Eske salaıyq, Ernur Baıǵurmanov Pavlodar oblystyq Memlekettik kirister departamentin bir jyldan beri basqaryp keledi.