100 myń balany qamtýy tıis «Kids go free» baǵdarlamasyna 1200 bala ǵana qatysqan – depýtat
«Elimizdegi týrıstik salanyń júıeli damyp, onyń ekonomıkalyq oń áserin kútkeli biraz jyldyń júzi boldy. Ár ýaqytta Qazaqstandaǵy týrızmniń turaqty damýyna kedergi keltiretin máseleler men qıyndyqtar týyndap otyratyny bar. Mysaly, týrıst bolsa – marshrýt joq, marshrýt bar da – ınfraqurylym joq, ınfraqurylym bolsa – usynatyn ónim joq. Bireýi bolsa, bireýi joq, shamasy bul salada júıeli jumys joq», - dedi depýtat Májilistiń jalpy otyrysynda.
E. Beısenbaev pandemııa aıaqtalyp, ishki týrızmge qyzyǵatyn, tólem múmkindigi bar týrısterdiń sany artqanyn atap ótti.
«Oǵan qosa sapaly, ári tarıhı týrıstik nysandar men kıeli oryndardyń sany artyp, olardyń jan-jaqty jarnamalanýyn baıqap otyrmyz. Bul sala úshin atalǵan jaǵdaıdy «sátti týrıstik ýaqyt» dep aıtýǵa keledi. Biraq, adam qalaǵanymen transporttyq júıe rettelmeýinen elimizdiń barlyq tabıǵı sulýlyǵyna jetý múmkin emes bolyp shyqty. Onyń ishinde áýe saparlary boıynsha eń kóp shaǵym kelip túsýde. Ushý jıiliginiń tómendigi, retteýge kelmeıtin túsiniksiz áýe bıletteriniń baǵa máselesi, qyzmet kórsetý sapasy men reısterdi negizsiz keshiktirý sııaqty máselelerdi tizip kete berýge bolady. Oǵan qosa, áýe kompanııalarymen týrpaketter boıynsha kelissózder júrgizý múmkin emestigin týragenttikter jıi kóteredi», - dedi E. Beısenbaev.
Depýtat áýe joldaryna qosa, temirjol máselesi de ózekti ekenin jetkizdi.
«Qazaqstan temirjolynyń týrıstik baǵyttardy damytýǵa qaýqary da, nıeti de joq sııaqty kórinedi. Bul kompanııa eldegi monopolıst bola tura, óziniń basty baǵytyn júk tasymaldaýǵa arnaǵan. Al, halyq qoldanatyn vagondardyń sapasy nashar, ıntermodaldy tasymaldaý tájirıbesi joq, týrıstik klastaǵy poıyzdar týraly aıtpaı-aq qoıalyq. Eýropany aıtpaǵanda, Ortalyq Azııa jáne ózge jekelegen memlekettermen baılanystyratyn halyqaralyq týrıstik júıeni qalyptastyra almadyq. Sonyń kesirinen Jibek joly boıyndaǵy temirjol marshrýttarynyń ornyn kórshiles Ózbekstan óz stılindegi jaıly vagondarymen týrıstik klaster retinde iske asyryp otyr», - dedi ol.
Úshinshiden, avtokólikpen júretin joldardyń jaǵdaıy syn kótermeıtini týraly depýtattyq saýaldar jeterlik.
«Tipti Memleket basshy bul máseleni sheshetin ýaqyt jetti dep Úkimetti súırelep júrgenin bilemiz. Bir ǵana mysal, elimiz boıynsha eń kemi 4 myń shaqyrymnan asatyn 166 baǵyt boıynsha avtojoldardy jóndeý men rekonstrýktsııalaý qajettigi anyqtalǵan. Jyl basynda depýtattardyń tabandy qoldaýymen týrızm salasyn damytýǵa oń áser beretin birneshe jańa usynys engizilgen edi. Biraq, bul máselede de bıýrokratııalyq shyrmaýlar kóbeıip, «Kids go free» baǵdarlamasymen 10 aıda nebári 1200 bala ǵana áýe saparlaryn tegin paıdalana alǵan, jospar boıynsha keminde 100 myń balany qamtımyz dep edi. Balanyń ushý bıleti qaıtarylady degenimiz qaıda? Baǵdarlamanyń tıimsizdigi eldiń Úkimetke degen jappaı senimsizdigin týyndatatyny anyq emes pe», - dedi E. Beısenbaev.
Buǵan deıin depýtat Qazaqstandaǵy ushaq reısteriniń jıi keshigýi máselesin kótergen edi.
Foto:flyertalk.com
