100 mln teńge tabys, 2 myń klıent: Qostanaıda narkobıznestiń joly kesildi
ASTANA. KAZINFORM — Qostanaı qalasynyń soty áleýmettik jeliler arqyly esirtki satý isi boıynsha aıyptaý úkimin shyǵardy.
Atalǵan qylmystyq isti tergeýdi QMA Qostanaı oblysy boıynsha departamenti júrgizdi.
Tergeý barysynda bir top adamnyń Telegram messendjerinde «Ths Seller» atty narkoshop ashqany anyqtaldy. Osy resýrs arqyly 2 myńnan astam klıent esirtki satyp alyp, jalpy aınalym 100 mln teńgeden asqan. Esirtki saýdasynan túsken tabysty qolma-qol aqshaǵa aınaldyrý úshin dropperlerdiń atyna rásimdelgen banktik kartalar paıdalanylǵan.
— Tintý kezinde jalpy salmaǵy 30 keliden asatyn marıhýana men gashısh tárkilendi. Sot úkimimen kináliler 8 jylǵa bas bostandyǵynan aıyryldy. Sonymen qatar, qylmystyq jolmen alynǵan tabysqa satyp alynǵan eki avtokólik memleket menshigine tárkilendi. Úkim zańdy kúshine engen joq, — delingen QMA taratqan aqparatta.
Budan buryn ІІM azamattardy dropperlerdiń qatysýymen jasalatyn esirtki qylmystary týraly eskertti.