100 myńnan asa mektep túlegi elimizdi kógaldandyrýǵa atsalysty
ASTANA. KAZINFORM — «Taza Qazaqstan» ekologııalyq aktsııasy aıasynda elimizdiń barlyq óńirinde bir mezgilde «Túlekterdiń aǵash egýi» eko-chellendji ótti, dep habarlaıdy Oqý-aǵartý mınıstrliginiń baspasóz qyzmeti.
Vedomstvo málim etkendeı, izgi bastama jas urpaqtyń tabıǵatqa degen jaýapkershiligin arttyrýǵa baǵyttalǵan keń aýqymdy ekologııalyq qozǵalysqa aınaldy.
Qazaqstannyń barlyq bilim berý uıymdarynda «Eńbekqorlyq jáne kásibı biliktilik aıy» jarııalanyp, onyń aıasynda «Halyqaralyq balalar kitaby kúni», «Halyqaralyq eskertkishter men tarıhı oryndardy qorǵaý kúni», «Ulttyq kitap kúni» jáne basqa da birqatar respýblıkalyq aktsııalar uıymdastyryldy. Bul bastama óskeleń urpaqty kitap oqýǵa, qaıyrymdy isterge baýlýǵa, sondaı-aq qorshaǵan ortaǵa degen qamqorlyq pen ekologııalyq mádenıettilikti qalyptastyrýǵa baǵyttalǵan. Sonymen qatar «Tabıǵatqa qamqorlyq jasaımyz» aktsııasy aıasynda mektep aýmaqtary men qoǵamdyq keńistikterde tazalyq jumystaryn júrgizý qolǵa alyndy.
— Aǵash egý eko-chellendji dástúrli sharaǵa aınaldy. Bıyl ol tórtinshi jyl qatarynan elimizdiń barlyq bilim berý uıymdarynda turaqty túrde ótkizilip keledi. Bıylǵy jyly eko-chellendjge 9 jáne 11 synyptardyń 100 myńnan astam oqýshysy qatysty. Olar mektep aýmaqtarynda, saıabaqtar men qoǵamdyq keńistikterde aǵash otyrǵyzyp, eldi mekenderdi kógaldandyrýǵa óz úlesterin qosty, — delingen habarlamada.
Aıta keteıik, osydan bir apta buryn «Keleshek mektepteri» jobasynyń oqýshylary da senbilikke qatysyp, qorshaǵan ortany qorǵaý isine belsendi úles qosqan bolatyn.
Osyǵan deıin búgin «Taza Qazaqstan» ekologııalyq aktsııasy aıasynda Ulytaý oblysynda «Túlekterdiń aǵash egý» eko-chellendji ótkenin jazǵanbyz.
