100 myń stýdent jasandy ıntellekt negizinde óz jobalaryn ázirlep jatyr
ASTANA. KAZINFORM – AI-Sana baǵdarlamasynyń ekinshi kezeńi aıasynda 100 myń stýdent jasandy ıntellekt negizinde óz jobalaryn ázirlep jatyr. Bul týraly Ǵylym jáne joǵary bilim vıtse-mınıstri Dınara Şeglova Ortalyq kommýnıkatsııalar qyzmetinde ótken baspasóz máslıhatynda aıtty.
Onyń sózinshe, AI-Sana baǵdarlamasy Memleket basshysynyń tapsyrmasymen iske qosylǵan. Bastamanyń negizgi maqsaty – jasandy ıntellekt tehnologııalaryn paıdalanatyn ǵana emes, el ekonomıkasyna qajetti qoldanbaly jobalar ázirleı alatyn jańa býyn mamandardy daıarlaý.
Baǵdarlama jasandy ıntellekt salasyna qajetti kadr daıarlaýǵa jáne stýdentterdiń tehnologııalyq bastamalaryn qoldaýǵa baǵyttalǵan. Alǵashqy kezeńde qatysýshylar jasandy ıntellekt boıynsha bazalyq bilim alyp, jetekshi halyqaralyq bilim berý platformalaryna qol jetkizdi. Nátıjesinde 673 myńnan astam sertıfıkat aldy.
— 2026 jylǵy 15 sáýirden bastap «Qazaqstan halqyna» qorynyń qoldaýymen baǵdarlamanyń ekinshi kezeńi bastaldy. Qazir 100 myń stýdent jasandy ıntellekt negizindegi kásipkerlik baǵytynda bilim alyp, óz jobalaryn ázirlep jatyr. Baǵdarlamaǵa qatysý úshin 209 myń ótinim tústi. Іrikteý jalǵasýda. Kún saıyn orta eseppen 1 500 jańa qatysýshy qosylyp otyr, — dedi Dınara Şeglova.
Vıtse-mınıstrdiń aıtýynsha, bul kezeńniń basty ereksheligi – teorııalyq bilimnen tájirıbege kóshý. Stýdentter óz ıdeıalaryn jobaǵa aınaldyryp, olardy jetildirýdi úırenedi. Keıin ázirlemeler naqty ónim deńgeıine deıin jetkiziledi.
Kelesi kezeńderde qatysýshylar jobalyq toptar quryp, jasandy ıntellekt jobalaryn damytady. Al baǵdarlamanyń sońǵy kezeńinde bastamalardy Astana Hub jáne QazInnovations uıymdarymen birlesip jetildirý, naryqqa shyǵarý jáne keńinen engizý kózdelgen.
Onyń málimetinshe, baǵdarlamany júzege asyrýǵa Stenford ýnıversıteti men Massachýsets tehnologııalyq ınstıtýtynyń ókilderi, halyqaralyq bıznes-mektepterdiń sarapshylary jáne Kremnıı alqabyndaǵy venchýrlik qorlar tartylǵan.
Qazir AI-Sana aıasynda 116 saǵattan astam oqý beınematerıaly daıyndalǵan. Baǵdarlamaǵa 63 halyqaralyq sarapshy, onyń ishinde Stenford ýnıversıteti men Carnegie Mellon University professorlary, sondaı-aq 29 ınvestor men venchýrlik qor qatysyp otyr.
Sonymen qatar oqý baǵdarlamasy ekonomıkanyń segiz negizgi salasy boıynsha ázirlengen 46 tájirıbelik mysalǵa negizdelgen.
Aıta keteıik, buǵan deıin júrgizilgen zertteý nátıjesinde Qazaqstandaǵy jumys kúshiniń shamamen 70 paıyzynda jasandy ıntellektiniń kómegimen eńbek ónimdiligin arttyrýǵa múmkindik bar ekeni anyqtalǵan bolatyn.
