100 mıllıon teńgeden asatyn bıýdjet shyǵyndary tsıfrlyq teńgege aýdarylady – Ulttyq bank
ALMATY. KAZINFORM - Almatyda ótip jatqan Central Asia Fintech Summit sammıtinde Ulttyq bank tóraǵasynyń orynbasary Bınur Jálenov bıýdjettik shyǵyndar úshin tsıfrlyq teńgeler qoldanylýy múmkin ekenin aıtty.
Tsıfrlyq teńge 100 mıllıon teńgeden asatyn birqatar bıýdjettik shyǵyndar úshin paıdalanylady.
Bınur Jálenovtyń aıtýynsha, tsıfrlyq teńgeni qoldanýdaǵy artyqshylyqtardyń biri - paıdalaný sharttaryn baǵdarlamalaý múmkindigi.
- Osylaısha tsıfrlyq teńgeniń qalaı jumsalyp jatqanyn baqylaı alamyz. Bul memlekettik qarajatty orynsyz jumsaýdyń aldyn alady. Aqsha naqty maqsatqa qoldanylatynyn bilemiz, - dedi Bınur Jálenov.
Jyl basynda tsıfrlyq teńgeni paıdalaný boıynsha bıýdjettik salalardy anyqtaıtyn tıisti buıryqqa qol qoıyldy.
- Barlyǵyn aıta almaımyn, biraq tsıfrlyq teńge qurylys, dári-dármekterdi satyp alý jáne basqa da salalarǵa qatysty bolady. 100 mıllıon teńgeden assa, tek tsıfrlyq teńge qoldanylady. Ol mınıstrlikter nemese ákimdikter bolýy múmkin, - dedi Ulttyq bank tóraǵasynyń orynbasary.
Qazir tsıfrlyq teńgeni paıdalanatyn 50-den astam belsendi joba bar jáne olardyń sanyn kóbeıtý josparlanyp otyr.
Ulttyq bank tóraǵasynyń orynbasary tsıfrlyq teńgeniń aınalymyn odan ári keńeıtý boıynsha úkimetpen jumys júrgizilip jatqanyn aıtty.
Eske salaıyq, buǵan deıin úsh jyldyq bıýdjet jobasy Quryltaı qaraýyna engizilgeni habarlandy.
