«100 mektep, 100 aýrýhana» máselesi Úkimettiń selektorlyq keńesinde qaralady
ASTANA. Jeltoqsannyń 22-si. QazAqparat /Arman Asqarov/ - Úkimettiń búgingi otyrysynda QR Premer-Mınıstri Kárim Másimov «100 mektep, 100 aýrýhana» máselesin jeltoqsannyń 28-i kúni ótetin Úkimettiń selektorlyq keńesiniń qaraýyna engizýdi tapsyrdy,
dep habarlaıdy QazAqparat.
Búgingi otyrys barysynda esep bergen QR Bilim jáne ǵylym mınıstri Janseıit Túımebaev baıan etkendeı, osy ýaqytqa deıin «100 mektep, 100 aýrýhana» baǵdarlamasy aıasynda 85 nysannyń qurylysy aıaqtaldy. Respýblıkanyń 14 oblysynyń 13-i osy bastama aıasyndaǵy barlyq jumystardy oıdaǵydaı atqaryp keledi. Ońtústik Qazaqstan oblysy ǵana bul jumysta baıaý jumys jasaýda.
Al QR Densaýlyq saqtaý mınıstri Jaqsylyq Dosqalıevtyń aıtýyna qaraǵanda, «100 mektep, 100 aýrýhana» baǵdarlamasy boıynsha aǵymdaǵy jyly josparlanǵan 11 nysannyń 1-eýi ǵana bitpeı qalǵan. Ol - Astanadaǵy emhananyń qurylysy. Qalǵan 4 nysan tolyǵymen paıdalanýǵa berilse, 6-ýyn arnaıy komıssııa tekserý ústinde.
Úkimet otyrysy barysynda QR Premer-Mınıstri Kárim Másimov «100 mektep, 100 aýrýhana» baǵdarlamasy aıasynda tapsyrylǵan qurylys nysandarynyń naqty sanyn anyqtaýdy tapsyryp, bul máseleni jeltoqsannyń 28-i kúni ótetin selektorlyq keńestiń qarýyna engizýdi tapsyrdy.
